Іран. Замест турмы — лекцыя пра хусткі

Нягледзячы на тое, што антыўрадавыя пратэсты ў Іране ідуць на спад, краіна відавочна рухаецца ў бок лібералізацыі.

Доказ таму — рашэнне тэгеранскай паліцыі не прыцягваць жанчын, якія з’яўляюцца на публіцы без хустак, да крымінальнай адказнасці.

Зараз з парушальніцамі ісламскага дрэс-коду вырашылі абыходзіцца больш мякка, а дакладней — перавыхоўваць.

Жанчын-парушальніц будуць адпраўляць у адмысловыя цэнтры, дзе з імі будуць праводзіцца гутаркі пра карысць нашэння хустак і, адпаведна, умераных паводзін. Ужо 7900 чалавек прайшло праз курсы, а ўсяго такіх цэнтраў у тэгеранскай правінцыі цяпер каля 100.

На жаль, вынік працы гэтых курсаў невядомы. Гэтак жа, як няма адказаў на шмат пабочных пытанняў: напрыклад, што будзе рабіць паліцыя, калі да яе ў рукі трапіць рэцыдывістка, якая адмаўляецца ад нашэння хусткі і пасля праслухоўвання лекцый.