Кітай і Індыя ўпершыню назвалі Расію агрэсарам. Што здарылася?

Шэраг краін, уключаючы Кітай, Індыю і Бразілію, упершыню з пачатку вайны ва Украіне прагаласавалі за рэзалюцыю ААН, у якой РФ названа агрэсарам. Раней яны ўстрымліваліся па такіх пытаннях. Што здарылася і пры чым тут Беларусь?

Фота з сайта businessinsider.com

Фота з сайта businessinsider.com


Генеральная Асамблея ААН прыняла рэзалюцыю аб супрацоўніцтве з Радай Еўропы. У гэтым дакуменце, у прыватнасці, гаворыцца пра «беспрэцэдэнтныя выклікі, якія стаяць перад Еўропай пасля агрэсіі Расійскай Федэрацыі супраць Украіны, а да гэтага супраць Грузіі».

Раптам за прыняцце рэзалюцыі прагаласавалі Кітай, Індыя і Бразілія, якія раней у падобных сітуацыях аддавалі перавагу пазіцыі ўстрымання. Аналагічную пазіцыю занялі Турцыя, Казахстан і Арменія, заўважае «Салідарнасць».

Палітолаг Аляксандр Сайгін з гэтай нагоды заўважыў: «Я гляджу, у «лепшага расійскага дыпламата» чарговы паспяховы поспех здарыўся. Гэтак да наступнай рэзалюцыі мы можам Беларусь у ліку тых, хто ўстрымаўся, убачыць».

Дагэтуль крамлёўская прапаганда спрабавала сцвярджаць, што большая частка свету на баку РФ, таму што за рэзалюцыі, якія асуджаюць агрэсію, не галасуюць найбуйнейшыя па насельніцтве дзяржавы — Кітай і Індыя, а таксама яшчэ шэраг краін. Цяпер і гэты маніпулятыўны аргумент абвергнуты.

«Байцы ідэалагічнага фронту» замітусіліся ў пошуках тлумачэння таго, што здарылася. Член савета па знешняй і абароннай палітыцы РФ Сяргей Маркаў з інтэрвалам у 50 хвілін выдаў дзве версіі.

Першая: «Галоўная прычына — адсутнасць ваеннай перамогі арміі Расіі над кіеўскім рэжымам ужо больш за год... Кітай і іншыя краіны дапускаюць, што Расія можа дапусціць такія памылкі, якія могуць прывесці яе да паражэння. А ўсе хочуць быць з пераможцам».

Другая: «Кітай і Казахстан, і Турцыя галасавалі не супраць Расіі, а за супрацоўніцтва ААН і Рады Еўропы. А ў гэту рэзалюцыю заходнія краіны прыцягнулі пункт супраць Расіі. Як яны гэта робяць цяпер вельмі часта. Дыпламаты краін Незахаду ўжо, мабыць, стаміліся лавіць антырасійскіх «рэзалюцыйных блох» у шматлікіх рэзалюцыях. І махнулі тут рукой».

Гэта проста смешна. Усе праекты рэзалюцый дыпламатычнымі прадстаўніцтвамі вывучаюцца гранічна скрупулёзна. У тэорыі можна было б дапусціць, што адна з каманд у гэтым выпадку была недастаткова ўважлівай. Але дакумент Генасамблеі ААН падтрымаў, як ужо гаварылася вышэй, цэлы шэраг дзяржаў, якія да гэтага часу захоўвалі нейтралітэт. Так што пра выпадковую памылку гаворкі ісці не можа.


Тым больш што гэта ўжо другі за тыдзень падарунак Маскве ад Пекіна. Першай стала тэлефонная размова паміж старшынёй КНР і прэзідэнтам Украіны. Расійскія прапагандысты з гэтай нагоды моцна засмуціліся. Бо Сі Цзіньпін дэ-факта прадэманстраваў, што лічыць Уладзіміра Зяленскага законным лідарам Украіны і, больш за тое, фігурай, з якой неабходна мець справу.

Магчыма, карэкціроўка пазіцыі Кітая звязана з раздражненнем, выкліканым дзеяннямі расійскага кіраўніцтва. Па выніках візіту Сі Цзіньпіна ў Маскву 21 сакавіка РФ і КНР выпусцілі сумесную заяву, важным мэсэджам якой з'яўлялася: «Усе ядзерныя дзяржавы не павінны размяшчаць ядзерную зброю за межамі нацыянальных тэрыторый».

А ўжо 25 сакавіка Уладзімір Пуцін заявіў пра намер размясціць расійскую ядзерную зброю ў Беларусі. Такое імклівае і грубае парушэнне публічна агучанага наўрад ці парадавала Кітай. Ды і астатніх таксама. Тэма распаўсюджвання зброі масавага знішчэння балючая нават для тых, хто назірае за вайной у Еўропе здалёк.

Рэзалюцыя аб супрацоўніцтве паміж ААН і Радай Еўропы, з якой, дарэчы, Расію раней выключылі, стала зручнай падставай для многіх, каб сказаць Крамлю сваё «фі». З аднаго боку, уварванне РФ ва Украіну не з'яўляецца асноўнай тэмай гэтага дакумента, а з другога, дзеянні Масквы недвухсэнсоўна называюцца агрэсіяй.

Такім чынам, Кітай, Індыя і іншыя дагэтуль «нейтральныя» краіны даюць зразумець, што ўстрымлівацца яны будуць не заўсёды. І калі Расія будзе працягваць у тым жа духу, то краіны, якія аддавалі перавагу статусу «над сутычкай», могуць зрабіць сваю пазіцыю больш жорсткай.