Макрон заклікаў ціснуць на Лукашэнку

Прэзідэнт Францыі Эмануэль Макрон правёў тэлефонныя перамовы з кіраўніком Польшчы Анджэем Дудам і прэм'ер-міністрам краіны Матэвушам Маравецкім. Французскі лідар выказаў падтрымку Варшаве ў міграцыйным крызісе, паведамляе korrespondent.net.

«Прэзідэнт рэспублікі пацвердзіў неабходнасць таго, каб Еўропа працягнула аказваць ціск на Аляксандра Лукашэнку, каб пакласці канец гэтай інструменталізацыі, якая падвяргае небяспецы многіх людзей», — сказана ў паведамленні.

Акрамя гэтага, Макрон звярнуўся з заклікам да еўрапейскіх краін працягнуць працу з асобнымі краінамі і авіякампаніямі, каб спыніць перамяшчэнні мігрантаў і тых,«хто не мае права на прытулак».

Сітуацыя на мяжы Польшчы і Беларусі абвастрылася 8 лістапада, калі туды арганізаванай калонай прыйшлі мігранты, якія хацелі трапіць на тэрыторыю Еўрасаюза.

Паводле заявы польскіх улад, да 15 лістапада ў ваколіцах закрытага памежнага пераходу «Брузгі» — «Кузніца» з беларускага боку заставаліся прыкладна 3,5 тысячы мігрантаў, якія арганізавалі лагер і спрабавалі патрапіць у Польшчу групамі.

Раней Беларусь заявіла, што большасць мігрантаў перамешчаныя з лагераў на польскай мяжы ў памежны транспартна-лагістычны цэнтр.