Пратэсты ў Парыжы перараслі ў сутыкненні з паліцыяй, ёсць пацярпелыя

Па меншай меры трое паліцэйскіх пацярпелі ў сутыкненнях з пратэстоўцамі падчас першамайскай дэманстрацыі ў Парыжы, паведамілі мясцовыя ўлады.

"Людзі ў масках кідалі розныя прадметы і кактэйлі Молатава ў паліцыю", — цытуе агенцтва “Франс прэс” паведамленне паліцыі.

У выніку на адным з паліцэйскіх загарэлася форма, ён атрымаў апёкі. Паведамляецца, што паліцыянты ў адказ ўжылі слёзацечны газ.

Сутыкненні пачаліся каля плошчы Бастыліі ў Парыжы, калі шэсце, арганізаванае трыма прафсаюзамі, накіроўвалася да суседняй плошчы.

У нейкі момант некалькі пратэстоўцаў падпалілі каляску з супермаркета, на якой быў усталяваны кардонны макет дракона, і накіравалі яе ў бок кардона паліцыі.

Па некаторых дадзеных, у выніку сутыкненняў з паліцыяй раненні атрымалі таксама ўдзельнікі акцыі, аднак афіцыйнай інфармацыі на гэты конт пакуль няма.

Дэманстрацыя праходзіць у Парыжы ва ўмовах узмоцненых мер бяспекі за тыдзень да другога тура выбараў прэзідэнта.

Папярэдні слайдНаступны слайд

Фота REUTERS

Паводле ВВС