Расія забараніла ўезд кіраўніку Еўрапарламента і яшчэ сямі еўрапейскім чыноўнікам

Расія забараніла ўезд старшыні Еўрапарламента Давіду Сасолі і яшчэ сямі грамадзянам Еўрасаюза. Аб гэтым паведамляецца на сайце расійскага міністэрства замежных спраў.

Таксама ў санкцыйным спісе аказаліся кіраўнік пракуратуры Берліна Ёрг Раўпах, член французскай дэлегацыі ў Парламенцкай асамблеі Савета Еўропы Жак Мэр, старшыня Нацыянальнага савета Латвіі па электронных СМІ Іварс Аболіньш, дырэктар Цэнтра дзяржаўнай мовы Латвіі Марыс Балтыньш, кіраўнік Моўнага дэпартамента Эстоніі Ільмар Томуск, кіраўнік Лабараторыі хімічнай, біялагічнай, радыяцыйнай і ядзернай бяспекі Даследчага інстытута татальнай абароны Швецыі Оса Скот і намеснік старшыні Еўрапейскай камісіі па пытаннях каштоўнасцяў і транспарэнтнасці Вера Юрава.
Расія забараніла ім уезд у адказ на санкцыі, уведзеныя Еўрасаюзам у сакавіку гэтага года супраць шасцярых расіян, гаворыцца ў паведамленні расійскага знешнепалітычнага ведамства.
"Падобныя дзеянні Еўрасаюза не пакідаюць сумневаў, што іх сапраўдная мэта — любой цаной стрымаць развіццё нашай краіны. Навязаць сваю аднабокую канцэпцыю "светапарадку, заснаванага на правілах", якая падрывала міжнароднае права. Кінуць непрыкрыты выклік самастойнасці расійскай знешняй і ўнутранай палітыкі", — заявілі ў расійскім МЗС.
"Робіцца гэта адкрыта і наўмысна. І, зразумела, з ведама і пры заахвочванні ЗША, не хаваюць зацікаўленасці ў паўторным ператварэнні Еўропы ў арэну вострага геапалітычнай канфрантацыі", — адзначаецца ў паведамленні міністэрства.
2 сакавіка Еўрасаюз увёў супраць Расіі санкцыі з-за сітуацыі з Навальным. У санкцыйны спіс тады трапілі чацвёра расійскіх сілавікоў — генпракурор Ігар Красноў, старшыня Следчага камітэта Аляксандр Бастрыкін, кіраўнік Росгвардыі Віктар Золатаў і дырэктар ФСВП Аляксандр Калашнікаў.
22 сакавіка Еўрасаюз увёў санкцыі супраць яшчэ дваіх расіян — кіраўніка аддзела МУС па горадзе Аргун Аюба Катаева і намесніка старшыні ўрада Чачні Абузайда Вісмурадава.
Яны патрапілі ў санкцыйны спіс, бо Еўрасаюз лічыць іх адказнымі за парушэнні правоў чалавека, у прыватнасці, за пераслед гомасексуалістаў у Чачні.
Бі-бі-сі