«Трапленне мядзведзеўскіх вінаграднікаў у спіс санкцый ЕС магло б знізіць узровень таксічнасці палітыка ў сацсетках»

Новае расследаванне выдання The Insider раскрыла магчымую прычыну залішняй агрэсіўнасці экс-прэзідэнта РФ і намесніка старшыні Рады бяспекі Расіі Дзмітрыя Мядзведзева ў сацыяльных сетках.

Публічныя выступы і пасады Дзмітрыя Мядзведзева дэградавалі да такога ўзроўню непрыстойнасці, што спарадзілі мноства канспіралагічных тэорый, напрыклад, пра тое, што яго публічныя прыніжэнні — расплата за спробу правесці ліберальныя рэформы, піша The Insider. Аднак выданне выявіла куды больш празаічнае тлумачэнне такіх паводзін намесніка кіраўніка Рады бяспекі РФ. Як высветлілася, нягледзячы на санкцыі, у Расію працягвае пастаўляцца віно з італьянскіх вінаграднікаў, што належаць Мядзведзеву.

Прычым даты паставак кожны раз дзіўным чынам папярэднічаюць яго скандальным публікацыям.

Тасканскую вінакурню Fattoria della Aiola з Дзмітрыем Мядзведзевым упершыню звязаў ФБК яшчэ ў 2017 годзе. Тады гэты бізнес у Італіі быў запісаны на кіпрскі афшор Furcina LTD, які належыць Іллі Елісееву — аднакурсніку, даверанай асобе і блізкаму сябру Мядзведзева. Цяпер структура валодання італьянскай фірмай Fattoria Dellа Aiola Societa Agricola a R. l. змянілася: замест аднаго кіпрскага афшора з'явіўся іншы, затое частка акцый належыць Елісееву наўпрост, пераканаўся The Insider.

Акрамя гэтага Елісееў — топ-менеджар «Газпромбанка», быў членам савета дырэктараў у «Аб'яднанай авіябудаўнічай карпарацыі» (уваходзіць у «Растэх», адказвае за распрацоўку і вытворчасць самалётаў).

Пасля пачатку поўнамаштабнай вайны з Украінай Дзмітрый Мядзведзеў працягвае атрымліваць віно з італьянскай вінакурні. Паводле дадзеных ImportGenius, 17 чэрвеня 2022 года ў Расію паступіла віно ад Fattoria della Aiola. Перавозіць тавар дапамагала фірма Wellman Logistics з Латвіі, а атрымальнікам выступіла ТАА «Рю дэ Він», якое праз ланцужок належыць АТ «Скалісты бераг». Заснавальнікам гэтай кампаніі выступаў падкантрольны Мядзведзеву фонд «Соцгоспроект» з расследавання Аляксея Навальнага.

Літаральна праз два дні пасля паступлення італьянскага віна Мядзведзеў піша ў Telegram допіс, у якім прагназуе знікненне Еўрасаюза і называе кіраўніцу Еўракамісіі Урсулу фон дэр Ляен «цёткай».

Наступная партыя з італьянскай вінакурні Мядзведзева прыйшла ў Расію праз месяц, 18 ліпеня. І зноў праз Рыгу: адпраўніком выступіла SIA Lionwine, а атрымальнікам — маскоўскае ТАА «Ліён Вайн». Увозіліся бутэлькі пад выглядам «узораў».

Невядома, ці ўдзельнічаў у пробах сам вінароб Мядзведзеў, але праз некалькі дзён пасля таго як бутэлькі перасеклі мяжу, ён піша допіс з пералікам «грахоў» Захаду, у якім выкарыстоўвае такія выразы, як «еўрапейскія дурачкі», «дзядуля з дэменцыяй» (пра прэзідэнта ЗША, а не тое, што вы маглі падумаць), «гарадскія вар'яты» (пра кіраўніцтва ЕС).

Затым ужо даволі буйная партыя віна Fattoria della Aiola была ўвезена ў Расію 13 кастрычніка 2022 года. Але ўжо не звязанай, як спачатку, асабіста з Мядзведзевым фірмай «Рю дэ він», а буйным імпарцёрам алкаголю «Містраль алка».

Усяго праз некалькі дзён пасля праходжання віном мытні ў Мядзведзева ўжо гатовы новы допіс пра «бандэраўскіх вылюдкаў».

У студзені 2023 года «ўзоры» віна з вінакурні Мядзведзева ў Таскане ўвезла «МБ група Імпэкс». Праз пару дзён пасля траплення напояў на тэрыторыю Расіі Мядзведзеў зноў піша абразы ў Telegram.

Звязаная з Мядзведзевым фірма «Рю дэ Він» увозіць у Расію і ўзоры іншага італьянскага віна. Так, у ліпені 2023-га яна купіла віно вытворчасці Vinicola Mediterranea. На наступны дзень пасля пастаўкі Мядзведзеў піша: «Ядзерны апакаліпсіс не толькі магчымы, але яшчэ і цалкам верагодны».

Напэўна, трапленне мядзведзеўскіх вінаграднікаў у спіс санкцый магло б знізіць узровень таксічнасці ў сацыяльных сетках. Зрэшты, на гэты выпадак ёсць у кампаніі «Скалісты бераг» (гэта значыць і ў самога Мядзведзева) уласная вінакурня ў Краснадарскім краі. Яна вырабляе 150 тысяч бутэлек віна на год.