У Іране двух ЛГБТ-актывістак асудзілі да смяротнага пакарання за «распаўсюд распусты на Зямлі»

Ісламскі рэвалюцыйны суд у іранскай правінцыі Заходні Азербайджан прысудзіў двух ЛГБТ-актывістак да смяротнага пакарання па справе аб «распаўсюдзе распусты на Зямлі». Пра гэта піша «Новая газета» са спасылкай на курдскую праваабарончую арганізацыю Hengaw.

Гаворка ідзе пра 31-гадовую Зару Седыгі Хамедані і 24-гадовую Эльхам Чубдар. Дзяўчатам абвясцілі прысуд у жаночым аддзяленні цэнтральнай турмы горада Урмія.

Іх абвінавачваюць у тым, што шарыяцкім законе гучыць як «распаўсюд распусты на Зямлі» праз «прапаганду гомасексуалізму», «прапаганду хрысціянства» і «зносіны са СМІ, якія выступаюць супраць Ісламскай Рэспублікі».

Гэта першы ў гісторыі Ірана смяротны прысуд, вынесены жанчынам праз іх сексуальную арыентацыю.

Па гэтай жа справе прысуд чакае яшчэ адна жанчына, 52-гадовая Сахейла Ашрафі.

Арганізацыя Hengaw у сваёй заяве заклікала міжнародную праваабарончую супольнасць звярнуць увагу на сітуацыю і дапамагчы асуджаным.

У студзені арганізацыя Amnesty International заклікала неадкладна вызваліць Зару Седыгі. Паводле інфармацыі праваабаронцаў, дзяўчына ўпершыню была затрыманая ў Іраку пасля таго, як з'явілася ў дакументальным фільме «Бі-бі-сі» пра ЛГБТ-людзей у гэтым рэгіёне.