У Раство пад грукат колаў. Чароўныя калядныя цягнікі супраць Метровіча

З 11 снежня ў Мінскім метрапалітэне пачалі курсіраваць саставы, «упрыгожаныя» да Калядаў і Новага года. Атрымалася як атрымалася: без густу, у чырвона-зялёных колерах, з дызайнам 20-гадовай даўнасці. Але можа быць і па-іншаму. Падрыхтавалі для вас падборку годных прыкладаў, як нашы еўрапейскія суседзі ўпрыгожваюць цягнікі да зімовых свят.

Да свят на абедзвюх лініях мінскага метро ходзяць два «навагоднія» цягнікі, дэкараваннем якіх займаліся дызайнеры са спрэчным густам. На адзін з шасці вагонаў наляпілі плёнку з зялёным фонам, чырвонымі падарункамі і Метровічам — недарэчным персанажам падземкі ў выглядзе вусатага дзеда ў фуражцы. Метрапалітэн, дарэчы, называе яго адным з фірмовых сімвалаў сталіцы.

На астатнія вагоны дызайнеры дадалі страшненькія налепкі з ялінкавымі шарыкамі — і ўсё, на гэтым «Merry Christmas»-настрой для мінчукоў гатовы!

Папярэдні слайдНаступны слайд

Улады настолькі ганарацца гэтай падзеяй, што навіны пра выхад цягніка разляцеліся па ўсёй Беларусі, аж да «раёнак» самых аддаленых гарадоў. Незалежныя медыя ж наўпрост высмеялі дапатопны дызайн.

Такім цемрашальствам штогод упрыгожваюць не толькі метрапалітэн, але і галоўныя плошчы, вуліцы, паркі кожнага горада, пакуль суседнія краіны за параўнальна невялікія грошы ствараюць сапраўдны калядны цуд са стылёвымі дэкарацыямі і сучасным падыходам.

Дзед Мароз на маршрутцы, хакей па лінолеуме і ялінка з ізалятараў ЛЭП — Новы год ці візуальнае пекла?

Паглядзіце, як чыгуначныя кампаніі суседскіх з Беларуссю краін паднімаюць настрой сваім пасажырам.

Літва

З 1 снежня літоўская чыгуначная кампанія «Lietuvos Geležinkeliai» запусціла чатыры калядныя цягнікі з фантастычным афармленнем салонаў. У пляцоўках для ровараў усталяваны калядныя ялінкі і святочныя інсталяцыі, сядзенні абцягнуты барвянымі аксамітнымі навалачкамі, на падлозе — раскошныя чырвоныя дываны, а ўздоўж паліц для багажу расцягнуты яловыя галінкі з ліхтарыкамі. Ля ўваходаў у цягнік да столі прымацаваны трамбоны, чамаданы, кветкі, таямнічыя гадзіннікі ды іншы святочны рэквізіт, а на лямпах асвятлення — прыгожыя налепкі з каляднымі казкамі. 

Фларыст і дэкаратар Мантас Петрушкявічус расказаў, што цягнікі ўпрыгожаны рознымі каляднымі сімваламі. Агульны стыль — гэта стыль Усходняга экспрэса, у якім з густам спалучаюцца раскоша і старажытнасць.

Калядныя цягнікі курсіруюць з Вільні па чатырох кірунках: Коўна, Клайпеда, Трокі і Моцкава (можна ехаць з Польшчы) да 7 студзеня. Набыць квіток менавіта на такія электрычкі магчыма праз афіцыйны дадатак «LTG Link»: там яны будуць абазначаны каляднай ялінкай.

Украіна

16 снежня «Укрзалізниця» запусціла святочны рэтра-цягнік па найдаўжэйшай вузкакалейцы ў Еўропе.

Гайваронская чыгунка праходзіць праз украінскае Падолле — Вінніцкую і Кіраваградскую вобласці. Яна не толькі прыцягвае шматлікіх прыхільнікаў чыгуначных рарытэтаў з усёй Еўропы, але і выконвае сваю асноўную функцыю па перавозцы пасажыраў. 

«Укрзалізниця» запрашае акунуцца ў зімовую казку і пракаціцца па маляўнічым заснежаным Падоллі на старым нямецкім паравозе з мінулага. Адзначаецца, што ў саставе каляднага цягніка будзе сталічная легенда з Кіеўскай дзіцячай чыгункі — цеплавоз Гр-336, выраблены ў 1951 годзе, а таксама чатыры пасажырскія вагоны Pafawag польскай вытворчасці.

У праграму ўваходзіць не толькі падарожжа, але і культурніцкая праграма, смачны гарачы абед на беразе магутнага Паўднёвага Буга і дабрачынны кірмаш у падтрымку Узброеных сіл Украіны. 

У мінулым снежні ўкраінская чыгунка выдзеліла на калядныя святы аўтэнтычны паравоз з залатым трызубам. На вакзале пасажыраў сустракалі казачныя памочнікі Святога Мікалая, а ў вагонах выхаванцы Кіеўскай дзіцячай чыгункі праводзілі цікавую экскурсію па гісторыі сталіцы.

 Польшча

7 снежня на лінію М1 варшаўскага метро традыцыйна выехаў стракаты святочны састаў. Ён мае прыгожую каляровую ліўрэю, расцягнутыя ўздоўж вокнаў ліхтарыкі і поручні ў выглядзе калядных ледзянцоў. Нічога надзвычайнага, але выглядае цягнік стылёва, верагодна, вельмі эканомна і дакладна з густам. Дзіўна, якім бывае свет без Метровіча.

Кожны тыдзень каляровы састаў будзе змяняць галінку і курсіраваць па іншай, каб падарыць добры настрой як мага большай колькасці пасажыраў падземкі. 

Папярэдні слайдНаступны слайд

Латвія

Што да апошняй беларускай суседкі, то ў 2019 годзе перавозчык «Pasažieru vilciens» зрабіў калабарацыю з гандлёвай сеткай мэблі «IKEA». Яны разам дэкаравалі звычайную савецкую электрычку бліскучымі каляднымі зоркамі. Ініцыятыва была накіравана на тое, каб прынесці больш святла і святочных пачуццяў у самы цёмны час года. 

«З надыходам зімы ўсе мы прагнем цяпла і ўтульнасці. Многія знаходзяць іх дома, у сем'ях.  Наш намер — зрабіць перадкалядны настрой яшчэ больш асаблівым і ўнесці больш святла ў цёмны час.  Мы ўпрыгожылі цэлы цягнік знакавымі каляднымі зоркамі, якія будуць асвятляць людзям дарогу дадому», — заявіў Петэрыс Грынбергс, менеджар «IKEA» ў Латвіі.

Цягнік быў асветлены 68 такімі зорачкамі. У Скандынавіі, адкуль родам гандлёвая сетка, аздабленне вокнаў перад Калядамі рознымі ўпрыгожаннямі з’яўляецца вельмі папулярнай забавай  — гэта звязана са старой традыцыяй паказваць кірунак тым, хто ў дарозе.  

Стварэнне ўнікальных упрыгожанняў у транспарце не абавязкова звязана з вялікімі выдаткамі. Наняць дасведчанага дызайнера — ключавы крок да таго, каб надаць прасторы стыль і індывідуальнасць без залішніх трат. Крэатыўныя ідэі прафесіянала могуць змяніць звычайныя элементы ў дзіўныя дэталі, робячы цягнік, плошчу ці краму ўнікальнымі, пры гэтым не перагружаючы бюджэт.

Але, відавочна, пакуль кіраўніцтва Мінскага метрапалітэна задаволена Метровічам ды падобнага кшталту крынжам, ні пра якія сучасныя дэкарацыі размовы ісці не можа.