Украіна не будзе ўдзельнічаць у Еўрабачанні-2019
Сёлета Украіна не будзе ўдзельнічаць у песенным конкурсе "Еўрабачанне", паведамляе hromadske.ua.
Эмблема ўкраінскага конкурсу "Еўрабачання"
Пасля адмовы спявачкі MARUV, якая перамагла на нацыянальным адборы, удзел быў прапанаваны выканаўцам, якія занялі другое і трэцяе месцы. Аднак Freedom Jazz і Kazka таксама адмовіліся ехаць на Еўрабачанне-2019. А гурт Brunettes Shoot Blondes, які заняў чацвёртае месца, заявіў, што не паедзе, калі яму прапануюць.
У Нацыянальнай грамадскай тэлерадыёкампаніі Украіны, якая арганізуе нацыянальны адбор, звярнулі ўвагу, што да скандалу прывялі выступы артыстаў на тэрыторыі Расіі. "Законы Украіны не прапануюць ніякіх абмежаванняў па працы выканаўцаў і артыстаў на тэрыторыі Расійскай Федэрацыі нягледзячы на вялікі грамадскі запыт на ўрэгуляванне гэтай сітуацыі", — кажуць арганізатары. На іх думку, гэтая тэма вартая дыялогу ў фармаце ток-шоў. Акрамя таго, прапануецца распрацаваць законапраект, які мог бы ўрэгуляваць сітуацыю з працай украінскіх артыстаў у Расіі надалей.
Паводле euroradio.fm