Украінскага палітыка Медвядчука, які ёсць кумам Пуціна, падазраюць у дзяржздрадзе, у яго прайшоў ператрус

У Кіеве ў доме ўкраінскага апазіцыйнага палітыка Віктара Медвядчука, якога называюць кумам прэзідэнта Расіі Ўладзіміра Пуціна, 11 мая прайшлі ператрусы.

Генеральная пракурорка Ўкраіны Ірына Венядзіктава паведаміла, што ў дачыненні да палітыка вылучылі падазрэнне ў дзяржаўнай здрадзе. Месцазнаходжаньне Медвядчука невядомае, распавядае «Свабода».

Генпракурорка не назвала прозвішчы Медвядчука, пазначыўшы яго як «народнага дэпутата М». — аднак з яе запісу відавочна, што гаворка ідзе менавіта пра аднаго з лідараў партыі «Апазіцыйная платформа — За жыццё». Тое, што крымінальная справа распачатая менавіта супраць Медвядчука, пацвярджаюць таксама крыніцы выдання «Ўкраінская праўда». Падазраваным з'яўляецца таксама яшчэ адзін дэпутат Вярхоўнай Рады — Тарас Казак.

Як піша генпракурорка, падазраваным ставіцца ў віну, у прыватнасці, замах на разрабаванне нацыянальных багаццяў у анэксаваным Крыме, у тым ліку «перадача каштоўных дакументаў, якія тычацца рэсурсаў ўкраінскіх нетраў» і прызнанне Крыму «часткай замежнай дзяржавы».

Ператрусы ў кіеўскім доме Медвядчука праводзяцца Службай бяспекі Ўкраіны пры ўдзеле спецназу «Альфа». Як паведамляецца, у гэтым доме палітык жыве з сям’ёй на час рамонту яго загараднага дому.

Віктар Медвядчук — кіраўнік грамадзкага руху «Ўкраінскі выбар — права народу», старшыня палітычнай рады партыі «Апазіцыйная плятформа — За жыцьцё», лідар фракцыі партыі ў Вярхоўнай Радзе Ўкраіны.

У лютым сёлета ўкраінскія ўлады ўвялі санкцыі адносна маёмасці Медвядчука.

У сакавіку Служба бяспекі Ўкраіны правяла ператрусы ў офісах руху «Ўкраінскі выбар — права народу», кіраваным Медвядчуком

Медвядчук — адзін з нешматлікіх украінскіх палітыкаў, які пасля 2014 году неаднаразова сустракаўся з Пуціным.