Усё ж дэфолт? Расія выплаціла купоны па еўрабондах у рублях

Мінфін Расіі на фоне забароны ЗША выкарыстоўваць для абслугоўвання знешняга доўгу замарожаныя валютныя рэзервы зрабіў аплату купоннага даходу па еўрабондах «Расія-2022» і «Расія-2042» у расійскіх рублях.

«Мінфін Расіі інфармуе, што замежны банк-карэспандэнт адмовіў у выкананні даручэнняў на выплату купоннага даходу і пагашэнне намінальнага кошту па аблігацыях знешніх аблігацыйных пазык РФ з тэрмінам пагашэння ў 2022 годзе выпуску "Расія-2022" і на выплату купоннага даходу па аблігацыях "Расія-2042" у агульнай суме $649,2 млн тэрмінам 4 красавіка 2022 года, накіраваных у адпаведнасці з эмісійнай дакументацыяй названых аблігацый 30 сакавіка і 31 сакавіка 2022 года адпаведна», — гаворыцца ў паведамленні міністэрства.

У сувязі з гэтым, як адзначае міністэрства, «4 красавіка 2022 года Мінфін Расіі пералічыў грашовыя сродкі НКА АТ “Нацыянальны Разліковы дэпазітарый” для ажыццяўлення названых выплат у валюце Расійскай Федэрацыі па афіцыйным курсе Банка Расіі на 4 красавіка 2022 года ў адпаведнасці з Указам Прэзідэнта Расійскай Федэрацыі ад 5 сакавіка 2022 года № 95 на рахункі сваіх кліентаў-дэпазітарыяў для правядзення разлікаў з усімі трымальнікамі дадзеных даўгавых інструментаў».

Варта зазначыць, што некаторыя кантракты сапраўды дазваляюць выплату ў рублях, але не ўсе. У прыватнасці, выплата будзе лічыцца зробленай, толькі калі будзе праведзена ў валюце, інакш гэта будзе азначаць дэфолт.

Пры гэтым рэйтынгавае агенцтва Fitch заявіла, што правядзенне Расіяй купонных выплат па доларавых еўрабондах у рублях будзе лічыцца суверэнным дэфолтам па заканчэнні 30-дзённага льготнага перыяду пагашэння доўгу. «Такая прымусовая рэдэнамінацыя выплат па даўгавых абавязацельствах будзе азначаць, што дэфолт або падобны дэфолту працэс пачаўся», — гаворыцца ў паведамленні Fitch.

Дэфолт стане чарговай шокавай падзеяй для рынкаў і курсу рубля. Аднак не зменіць сітуацыю прынцыпова, бо многія замежныя інвестары ўжо сышлі з расійскіх актываў, а ЦБ абмежаваў магчымасці замежнікаў па вывадзе капіталу з краіны. Дэфолт у такой сітуацыі можа толькі пагоршыць крызіс, але не стаць яго асноўнай прычынай.