«Дэфіцыт кадраў — не падстава адмовіцца ад звальненняў па палітычных матывах»
Беларускай эканоміцы не хапае больш за 150 тысяч работнікаў. Дэфіцыт кадраў у Беларусі расце, а абяцаная стабілізацыя на рынку працы ўсё ніяк не надыходзіць. Не дапамагае ні павышэнне заробкаў, ні статыстычныя маніпуляцыі. Як беглі людзі ад стабільнасці куды падалей, так і бягуць.
Хоць рэцэпт на самай справе просты: саджаць трэба менш, яны і не пабягуць. Але менавіта гэты просты рэцэпт беларускім уладам і недасяжны. Саджаць менш яны ўжо не ўмеюць, піша Андрэй Бранішэўскі ў Plan B.
Колькі тысяч чалавек не хапае?
Сто пяцьдзесят тысяч чалавек — гэта толькі тыя, якіх не хапае афіцыйна. То-бок, гэта колькасць вакансій, якая значыцца ў Рэспубліканскім банку вакансій. Але не ўсе працадаўцы, якім не хапае кадраў, хочуць мець што-небудзь агульнае з рэспубліканскім банкам вакансій.
А яшчэ ёсць статыстычныя маніпуляцыі. А ў статыстычных маніпуляцыях беларускія чыноўнікі дасягнулі такога ўзроўню майстэрства, што ўжо нават Лукашэнка просіць іх не хлусіць. Ну прынамсі яму. Але ж усё роўна хлусяць. Каб дэфіцыт кадраў менш кідаўся ў вочы, многія дзяржструктуры ідуць па шляху скарачэння штатных адзінак, якія няма каму заняць.
Вось па афіцыйных даных на пачатак сакавіка ў краіне не хапала 6,5 тысяч лекараў. Па незалежных ацэнках на самай справе дэфіцыт лекараў — каля 10 тысяч. Таму што сорак адсоткаў беларускіх лекараў працуюць больш чым на паўтары стаўкі.
А яшчэ ёсць людзі, якія беларускімі ўладамі лічыліся па разрадзе дармаедаў. Але пры гэтым плацілі беларускай дзяржаве падаткі і квартплату па павышаных тарыфах. Цяпер яны беларускімі ўладамі таксама лічацца па разрадзе дармаедаў, але плацяць падаткі польскай, літоўскай ці нямецкай дзяржаве.
Увосень генерал Карпянкоў казаў, што толькі ў заходнім кірунку з краіны з'ехалі 350 тысяч чалавек. Але гэта было восенню і толькі ў заходнім кірунку. А па выніках нядаўняга даследавання Белстату, ў Расіі працуе больш за 60 тысяч беларусаў. Зноў жа — афіцыйна.
Так што ў рэальнасці беларускай эканоміцы не хапае не 150 тысяч чалавек, а ў разы больш. Нават калі палова з тых, каго не стае, лічылася беларускімі ўладамі дармаедамі.
Глядзіце таксама
Нічога не дапамагае
Ужо колькі разоў чыноўнікі паўтаралі, што сітуацыя на рынку працы стабілізуецца. Горш ужо не будзе. А рынак працы ім аптымістычна адказваў: будзе, абавязкова будзе. Па стане на травень мінулага года дэфіцыт кадраў у краіне складаў 120 тысяч чалавек. У пачатку гэтага года эканоміцы не хапала 134 тысяч. Гэта значыць, за год дэфіцыт вырас на 30 тысяч чалавек, з якіх рост у 16 тысяч прыйшоўся на апошнія чатыры з паловай месяцы.
Павышэнне заробкаў, якія выраслі на 20 адсоткаў, дапамагае асобным прадпрыемствам і трошкі некаторым галінам. Але вырашыць праблему глабальна, у маштабах усёй эканомікі, не дапамагае. Пры росце заробкаў у машынабудаванні з тэмпаў вышэй сярэдняга МАЗу не хапае 14 адсоткаў работнікаў.
Яшчэ менш карысці ад экзатычных ідэй, якія прыходзяць у галаву беларускім чыноўнікам на разнастайных узроўнях. На самай справе ад іх экзатычных ідэй становіцца толькі горш. Прыгразілі запрыгоніць выпускнікоў вну, дык з краіны пабеглі выпускнікі школ. Хацелі ўпарадкаваць занятасць сярод чыноўнікаў, дык падобна, і сярод чыноўнікаў з'явіўся дэфіцыт кадраў.
Беларускі МУС вырашыў пасільным спосабам дапамагчы ў вырашэнні праблемы дэфіцыту кадраў і прайшоўся з рэйдам па вёсках. Выявілі 70 тысяч дармаедаў. Трэба думаць, што наступны крок — іх гвалтоўнае працаўладкаванне. Недарма ж хадзілі. Паляпшэнню паказчыкаў занятасці гэта, вядома, дапаможа. Эканоміцы — наўрад ці. Таму што да кожнага гвалтоўна працаўладкаванага дармаеда прыйдзецца прыставіць наглядчыка.
Нават некалькі тысяч патрыятычна настроеных пенсіянераў, на якіх разлічваў Лукашэнка, для беларускіх заводаў не знайшлося.
Глядзіце таксама
Саджаць трэба менш
А няма адкуль ім знайсціся. Ні патрыятычна настроеным пенсіянерам на заводы, ні кадрам. Таму што падыходных для эканомікі кадраў у краіне не хапае фізічна. Гэта значыць, кадры ў краіне ёсць. Толькі эканоміцы ад гэтых кадраў ніякай карысці, акрамя шкоды.
Серыйная дармаедка Бондарава і прыхільнік рэпрэсій Азаронак прыбавачнага прадукту ствараць не ўмеюць. Яны прыбавачнай прадукт умеюць толькі псаваць. Хто-небудзь можа і рады быў бы ўжо перагарнуць старонку, ды змагары за стабільнасць не даюць.
Таму што стабільнасць у Беларусі так уладкаваная, што змяншэння рэпрэсій яна можа і не вытрымаць. Па даных праваабарончага цэнтра «Вясна» за першыя тры месяцы года па палітычных матывах у Беларусі затрымалі каля тысячы чалавек. За красавік — яшчэ трыста. У чым стабільнасць дамаглася поўнай стабільнасці, дык гэта ў колькасці рэпрэсій на душу насельніцтва за справаздачны перыяд. Дэфіцыт кадраў — не падстава адмовіцца ад звальненняў па палітычных матывах.
Таму што за дэфіцыт кадраў у краіне адказваюць адны, а за стабільнасць — зусім іншыя. І іх інтарэсы адзін аднаму раўналежныя. Таму, пакуль заводы шукаюць рабочых, сілавікі і пракуроры вынаходзяць новыя падставы для рэпрэсій.
Таму што ў сілавікоў і прапагандыстаў свае справаздачы і ўласнае ўяўленне пра стабільнасць.