Крыніцы: МТС могуць прадаць туркам — расіяне не супраць

«Нашай Ніве» стала вядома, што абмяркоўваецца магчымасць продажу сотавага аператара МТС, 51% акцый якога належыць дзяржаве ў выглядзе «Белтэлекама», а яшчэ 49% — расійскім «Мабільным тэлесістэмам».

Як паведамляюць крыніцы, разглядаецца продаж беларускага МТС адной з турэцкіх кампаній. Разам з МТС улады хацелі б прадаць і «Белтэлекам» («Белтэлекам» называецца адной з цэляў для пятага пакета санкцый).

«Рускія не супраць гэтай угоды, іх ужо так дапякла гэтая беларуская гісторыя і вечнае чаканне горшага, што яны нават гатовыя дапамагчы беларусам прадацца, каб далей імі займаўся нехта іншы.

Сума ўгоды вельмі залежыць ад умоў, як яны дамовяцца прадаваць — толькі беларускую частку, ці беларускую разам з расійскай, гэта ўсё з "Белтэлекамам" ці без яго.

За беларускую долю хочуць 300 мільёнаў долараў, але гэта малаімаверная сума, бо прадаць актыў у Беларусі ўжо даволі складана. Спрашчае сітуацыю тое, што туркі ўжо прысутнічаюць на рынку, "Life" належыць "Turkcell"», — паведамляюць абазнаныя крыніцы.

Нагадаем, учора ў «МТС-Беларусь» змяніўся дырэктар. Шматгадовага кіраўніка Уладзіміра Карповіча змяніў сын чыноўніка Уладзіміра Андрэйчанкі Уладзіслаў. Маскоўскія акцыянеры, роўна як і менеджмент кампаніі, даведаліся пра гэтае прызначэнне з БЕЛТА.