Падкруцілі: інфляцыя за 2021 год склала 9,97%

Інфляцыя ў Беларусі за снежань 2021 года склала 0,9%. А за ўвесь мінулы год — 9,97%.


Гэта самы вялікі паказчык з 2016 года, піша Еўрарадыё са спасылкай на Нацыянальны статыстычны камітэт.

Найбольш за год выраслі цэны на харчовыя тавары — 11,4% (за снежань — 1,3%). Нехарчовыя тавары за год падаражэлі на 9,9% (0,3% за снежань), паслугі — 7,6% (0,9% за снежань). Пры гэтым сацыяльна значныя тавары, на якія дзяржава стрымлівае кошты, за 2021 год дадалі ў кошце на 9,1%.

Чыноўнікі планавалі да канца мінулага года падняць цэны і тарыфы на некаторыя тавары і паслугі. Сярод іх —праезд у грамадскім транспарце. Чакалася, што праезд у гарадскім грамадскім транспарце павінен падаражэць на 6,8%, або 5 капеек за адну паездку (гаворка пра падаражэнне аднаго талона). Аднак гэтае рашэнне адклалі, каб не псаваць паказчыкі.

Таксама планавалі падняць тарыфы на пасажырскія перавозкі прыгарадным аўтамабільным транспартам — на 11,1%, або на 1 капейку за адзін кіламетр. Аднак у выніку павышэнне тарыфаў перанеслі на гэты год.

Таксама на просьбу ўладаў «Белтэлекам» перанёс рост тарыфаў на паслугі з лістапада мінулага года на 1 студзеня гэтага.

Калі б улады здзейснілі ўсё запланаванае, інфляцыя перасягнула бы двухзначную лічбу. Таму можна сказаць, што яе «падкруцілі» дзеля добрага, але ўсё роўна самага вялікага за пяць гадоў, паказчыку.



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: