PandaDoc ліквідуе кампанію ў Беларусі

Эканоміка

Звесткі аб ТАА «Пандадок» з’явіліся ў спісе кампаній, якія знаходзяцца ў працэсе ліквідацыі. Такі спіс публікуе часопіс «Юстыцыя Беларусі».

0033475159cb15e917718d1d04bbc512.jpg


Рашэнне аб ліквідацыі ТАА «Пандадок» прынята 22 лютага 2021 года. У якасці ліквідатара выступае кампанія «Сарайнен і партнёры», паведамляе dev.by.

Dev.by звярнуўся па каментары да заснавальнікаў PandaDoc Мікіты Мікада і Сяргея Барысюка, але пакуль не атрымаў адказу.

У верасні Мікіта Мікада распавёў, што PandaDoc адкрывае офіс ва Украіне. На той момант туды пераехалі 60 супрацоўнікаў кампаніі. На сайце PandaDoc большасць тэхнічных вакансій адкрыты ў кіеўскім офісе. У Мінску засталася толькі адна вакансія.

Заснавальнікі кампаніі Сяргей Барысюк і Мікіта Мікада летам ініцыявалі стварэнне прыватнай ініцыятывы па зборы грошай для сілавікоў, якія вырашылі змяніць прафесію.

2 верасня ў мінскім офісе PandaDoc прайшлі ператрусы. 7 з 20 супрацоўнікаў былі затрыманыя для допыту. На працягу двух дзён супрацоўнікі ДФР апытвалі больш за 100 супрацоўнікаў кампаніі.

4 верасня стала вядома пра ўзбуджэнне крымінальнай справы па ч. 4 арт. 210 КК РБ у дачыненні да чатырох супрацоўнікаў кампаніі:

  • дырэктара Дзмітрыя Рабцэвіча;
  • менеджара па прадукце Віктара Куўшынава;
  • бухгалтара Юліі Шардыка;
  • HR Уладзіслава Міхалапа.

Паводле версіі следства, яны як група асоб, выкарыстоўваючы службовае становішча, завалодалі грашовымі сродкамі ў памеры каля 107 тысяч беларускіх рублёў з бюджэту.

11 верасня супрацоўнікам кампаніі было прад’яўленае абвінавачанне, але ўжо па іншым артыкуле: не крадзеж з бюджэту, а махлярства — ч. 4 арт. 209, ад трох да дзесяці гадоў.

Крымінальны пераслед Мікіта Мікада і Сяргей Барысюк звязваюць з праектам дапамогі сілавікам. 15 верасня Мікіта абвясціў, што прыпыніў праект дапамогі. Ініцыятыву падхапіў CEO DeepDee Яраслаў Ліхачэўскі.

23 верасня стала вядома, што кампанія PandaDoc дамаглася зняцця арышту са свайго рахунку. Для гэтага кампанія пералічыла на дэпазіт Следчага камітэта 107 тысяч рублёў у эквіваленце.

11 кастрычніка дырэктара PandaDoc Дзмітрыя Рабцэвіча выпусцілі з СІЗА КДБ пад хатні арышт. 13 кастрычніка змененая мера стрымання яшчэ двум фігурантам справы: галоўны бухгалтар кампаніі Юлія Шардыка і HR Уладзіслаў Міхалап вярнуліся дадому.

Пад вартай застаецца менеджар па прадукце Віктар Куўшынаў.