Паўтара месяцы прастойвае экспарт беларускай нафты

Траплянне забруджанай расійскай нафты ў нафтаправод «Дружба» і перакрыццё «трубы» прывялі да спынення экспарту беларускай нафты. Пра гэта TUT.BY распавялі інфармаваныя крыніцы і пацвердзілі ў канцэрне «Белнафтахім».

«Так, экспарт беларускай нафты стаіць. Аднаўленне паставак прагназуем з ліпеня», — сказалі ў «Белнафтахіме». У канцэрне спадзяюцца нагнаць аб'ёмы, якія яны не дапаставілі, да канца года.

Беларускія заводы вырабляюць маторнае паліва з расійскай нафты, а «Беларуснафта» набывае нафтапрадукты ў айчынных НПЗ для рэалізацыі ў розніцу і оптам.

Раней паведамлялася, што з 10 чэрвеня павінен адкрыцца польскі кірунак нафтаправода «Дружба».

Нагадаем, 19 красавіка «Белнафтахім» заявіў пра «рэзкае пагаршэнне» якасці расійскага гатунку нафты Urals, які паступае транзітам па нафтаправодзе «Дружба». 23 красавіка Беларусь прыпыніла экспарт светлых нафтапрадуктаў ва Украіну, Польшчу і краіны Балтыі. 2 траўня чыстая расійская нафта стала паступаць у Беларусь, а адгрузка нафтапрадуктаў была адноўленая. У цяперашні час бакі чысцяць «Дружбу» ад «бруду» і разлічваюць памер нанесенай шкоды.

У Беларусі здабычай нафты займаецца дзяржкампанія «Беларуснафта». У год яна здабывае 1,65 мільёна тон нафты. Уся беларуская нафта ідзе на экспарт. «Гэта выгадна дзяржаве, таму што ўся экспартная пошліна паступае ў бюджэт. Па-другое, гэта валютная выручка, якая станоўча ўплывае на гандлёвы баланс краіны», — растлумачыў у інтэрв'ю TUT.BY намеснік гендырэктара «Беларуснафты» Сяргей Каморнікаў. Акрамя таго, кампанія працуе ў рэгіёне з цяжказдабывальнымі запасамі нафты.

Беларускія заводы вырабляюць маторнае паліва з расійскай нафты, а «Беларуснафта» набывае нафтапрадукты ў айчынных НПЗ для рэалізацыі ў розніцу і оптам.

Паводле tut.by