Улады істотна павысяць падаткі для рэпетытараў, вядучых вяселляў, будаўнікоў, цырульнікаў, касметолагаў

Чыноўнікі хочуць у 2023 годзе істотна падняць адзіны падатак з індывідуальных прадпрымальнікаў і фізічных асоб, якія працуюць без ІП, піша «Л*стэрка».

Напрыклад, для рэпетытараў у Мінску — з 82 да 164 рублёў месяц, а для будаўнікоў — з 292 да 438 рублёў. Гэтыя магчымыя новаўвядзенні прадугледжаны праектам змяненняў падатковага кодэкса.

Як хочуць змяніць адзіныя падаткі для фізічных асоб, якія працуюць без ІП

Адзіны падатак за распрацоўку вэб-сайтаў, наладу камп'ютараў і ўстаноўку праграмнага забеспячэння ў Мінску прапануюць павысіць да 593 рублёў (цяпер збор складае 237 рублёў), у абласных цэнтрах і Мінскім раёне — да 548 рублёў (цяпер — 219 рублёў).

За музычна-забаўляльнае абслугоўванне вяселляў, юбілеяў (да прыкладу, паслугі тамады) хочуць усталяваць адзіны падатак для Мінска да 518 рублёў (цяпер — 259 рублёў), а для абласных цэнтраў і Мінскага раёна прапануюць падняць да 478 рублёў (сёння — 239 рублёў).

Адзіны падатак за рэпетытарства ў Мінску могуць падняць да 164 рублёў (цяпер ён складае 82 рублі), у абласных цэнтрах — да 152 рублёў (сёння — 76 рублёў).

Пры гэтым стаўкі за продаж кацянят хочуць пакінуць на ранейшым узроўні: для Мінска — 94 рублі, а для абласных гарадоў і Мінскага раёна — 87 рублёў.

Якія стаўкі адзінага падатку хочуць увесці для фізічных асоб, якія працуюць без ІП (рублёў):

                          Мінск        абласныя цэнтры і Мінскі раён

відэаздымка падзей               526 (цяпер — 263)     486 (цяпер — 243)

налада, рамонт музычных

інструментаў                  252 (цяпер — 126)      234 (цяпер — 117)

цырульні і касметычныя

паслугі, паслугі па манікюры

і педыкюры                   339 (цяпер — 226)      312 (цяпер — 208)

рамонт і аднаўленне,

уключаючы перацяжку хатняй мэблі        224 (цяпер — 149)     206 (цяпер — 137)

чыстка і ўборка жылых

памяшканняў                  286 (цяпер — 143)      260 (цяпер — 130)

тынкавыя, малярныя,

шкляныя работы, работы па

ўпарадкаванні пакрыццяў падлогі,

абліцоўванні сцен, устаноўцы дзвярэй і вокнаў   438 (цяпер — 292)     269 (цяпер — 404)

Як хочуць падняць адзіны падатак для ІП

Адзіны падатак для індывідуальных прадпрымальнікаў хочуць таксама падняць. Да прыкладу, для ІП, якія займаюцца здачай у кароткатэрміновую арэнду нерухомасці, падатак могуць павялічыць да 620 рублёў у Мінску (цяпер — 413 рублёў), а ў абласных гарадах — да 578 рублёў (цяпер — 385 рублёў). Гэта збор за кожную кватэру, жылы дом, садовы домік або дачу.

Падатак за рамонт прадметаў асабістага карыстання і бытавых вырабаў могуць падняць у сталіцы да 612 рублёў (цяпер — 306 рублёў), а ў абласных гарадах — да 424 рублёў (цяпер — 212 рублёў).

Пры гэтым у 2023 годзе скароцяць спіс паслуг, якія могуць аказваць ІП з выплатай адзінага падатку.

Удакладнім, што змены ў Падатковы кодэкс на 2023 год пакуль не зацверджаны.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: