Адкрыццё мемарыяльнай дошкі да #БНР100 перанясуць на тыдзень пасля 25 сакавіка

Мемарыяльная дошка ў гонар абвяшчэння незалежнасці БНР, якую маюць павесіць на доме на вуліцы Валадарскага, 9, дзе была падпісаная Трэцяя Ўстаўная грамата, гатовая да мантажу, паведамляе Радыё Свабода.

Устанавіць яе меркавалі напярэдадні 25 сакавіка, ды гарадcкія ўлады не паспяваюць узгадніць. Але, як кажа старшыня Беларускага саюзу мастакоў Рыгор Сітніца, які звяртаўся ў Мінгарвыканкам з просьбай дазволіць устаноўку дошкі, улады не супраць і толькі спрыяюць працэсу.
«Мінгарвыканкам яшчэ не прыняў фармальнага рашэньня: вусна ўсё ў норме, але з чыста тэхнічных прычынаў не было паседжання», — кажа Сітніца.
Паводле Сітніцы, адкрыццё дошкі анансавалі зарана — да выканання неабходных працэдураў і атрымання дазволу на імпрэзу. Адпаведныя паседжанні звычайна адбываюцца па чацвяргах, але раней іх не маглі арганізаваць, бо старшыня Мінгарвыканкаму быў у ад’ездзе. Паседжанне мае адбыцца 22-га або 23-га сакавіка — улады папрасілі перанесці адкрыццё дошкі на наступны тыдзень.
«Я не бачу ў гэтым вялікай праблемы, — кажа Сітніца. — Спачатку прымаецца рашэнне ўладаў, якія дазваляюць павесіць дошку, затым тыя, хто яе робяць, павінны паказаць яе гарадской мастацкай радзе, якая робіць заключэнне, што не мае пярэчанняў супраць эскізу і месца, і калі ўзгадняе, то гэтая дошка выконваецца ў матэрыяле, пішацца заяўка на час адкрыцця.
Так рабілася, калі ставілі мемарыяльны знак на месцы дамоў братоў Луцкевічаў, тады не ўзнікла ніякіх праблемаў, бо загадзя было ўзгодненае месца, эскіз, а пасля час адкрыцця.
Я атрымаў ліст ад гарадскіх уладаў, дзе напісана, зачытваю: «Са свайго боку паведамляем аб адсутнасці прынцыповых пярэчанняў правядзенню масавага мерапрыемства пры ўмове ажыцьцяўлення ўсіх працэдур"».

Сітніца дадае, што «25-м святкаванне не заканчваецца», пасля 25 сакавіка будуць праходзіць розныя імпрэзы і выставы, прысвечаныя БНР. Ён перакананы, што дошку ўстановяць і адкрыюць на наступным тыдні, як толькі тое дазволяць улады, і падкрэслівае, што адкрыццё пераносіцца не на «няпэўны час», а менавіта на наступны тыдзень.
***
Новая дошка зробленая з бронзы на ўзор папярэдняй, якую скульптар Алесь Шатэрнік адліў з сплаву алюмінію і крэмнію яшчэ ў 1993 годзе. Грошы на новую дошку сабралі талакой усяго за тры гадзіны. Надпіс на ёй зроблены афіцыйным правапісам; такое было патрабаванне ўладаў.
Арганізатар краўдфандынгу для вырабу памятнай дошкі Глеб Лабадзенка напісаў у сваім фэйсбуку, што пасьля канчатковага разліку засталося 1130 рублёў. Гэтыя сродкі перададуць на арганізацыю канцэрту «Свята Незалежнасьці» 25 сакавіка каля Опернага тэатру.