«Стала празрыстай, але трымаецца цвёрда». Палітзняволеная Марфа Рабкова страціла прытомнасць у камеры

Адвакат Наталля Мацкевіч пабачылася са сваёй падабароннай, якая амаль 10 месяцаў знаходзіцца за кратамі.

Пасля сустрэчы Наталля Мацкевіч напісала на сваёй старонцы ў твітары: «Сёння наведвала Машу Рабкову. Яна стала тонкай, празрыстай, але трымаецца цвёрда. Сказала, што прачытала: «Не людзі выбіраюць часы, у якіх жыць, а часы выбіраюць людзей». І кажа: «Калі час выбраў нас, мы павінны справіцца».
Як пазней паведамілі праваабаронцы, у камеры праз спёку МАрфа Рабкова страціла прытомнасць.

Каардынатарка Валанцёрскай службы «Вясны», праваабаронца Марфа Рабкова была затрыманая 17 верасня. У яе кватэры быў праведзены ператрус, вынятая тэхніка, асабістыя грошы і рэчы.

Спачатку дзяўчыне інкрымінавалі ч. 3 арт. 293 Крымінальнага кодэксу. Пазней прад'явілі новыя абвінавачванні па ч.3 арт.130 КК і ч.2 арт. 285 КК. Цяпер Марфе Рабковай пагражае да 12 год пазбаўлення волі.