Чатыры гады таму затрымалі Віктара і Эдуарда Бабарыкаў

Меркаваны фаварыт прэзідэнцкіх выбараў былы банкір Віктар Бабарыка быў затрыманы ў Мінску 18 чэрвеня 2020 года разам з сынам Эдуардам. Цяпер яны закратамі, асуджаныя на доўгія тэрміны па сфабрыкаваных крымінальных справах. Прызнаныя палітычнымі зняволенымі.

«Чатыры гады таму рэжым кінуў за краты двух смелых і таленавітых беларусаў — Віктара і Эдуарда Бабарыкаў, — заявіла з нагоды гадавіны затрымання бацькі і сына Святлана Ціханоўская. —

Колькі часу патрэбна, каб людзі забылі сваіх герояў? «Месяц-другі — і яго ніхто не ўспомніць», – напэўна так думаюць памагатыя рэжыму, калі пазбаўляюць людзей волі. Але беларусы ніколі не адмовяцца ад тых, хто гатовы рабіць Беларусь лепшай.

Рэжым адбірае ў палітвязняў свабоду, здароўе, сям’ю і сяброў. Але не адбярэ годнасць і стойкасць. Іх ізалююць ад знешняга свету, а значыць яны не змянілі поглядаў — і ўсё так жа моцна вераць у нас, у беларусаў.

Так, за гэты час на нашую долю выпала нямала жахаў: гвалт, пераслед, эміграцыя, рэпрэсіі, вайна. Гэта цягне за сабой жаданне адмежавацца, замкнуцца ў шкарлупіну, не чытаць навіны пра чарговыя затрыманні, забыцца на імёны злачынцаў. Але ў такія моманты мы мусім узгадваць нашых герояў. Тых, хто нават у жудасных умовах кожны дзень адмаўляецца здраджваць сабе. Таму мы не можам здрадзіць ім.

Мае дарагія! Кожная кропля падтрымкі ўліваецца ў вялікае мора надзеі. Кожная вестачка дае разуменне, што людзі на волі шукаюць шляхі дапамогі і вызвалення кожнага і кожнай.

Дасылайце лісты, паштоўкі, пасылкі за краты. Рабіце ўсё, каб заставацца на сувязі з тымі, каго рэжым катуе турмамі і прымусовай працай. Я вельмі добра ведаю, колькі моцы і натхнення надае вашая падтрымка — і заклікаю працягваць падтрымліваць палітзняволеных».

Былы палітвязень: Бабарыка ў калоніі пасівеў, вельмі моцна пастарэў, выглядае нядобра

Віктара Бабарыку затрымалі па эканамічных абвінавачаннях: «легалізацыя злачынных даходаў» і «атрыманне хабару ў асабліва буйным памеры». А вось прысуд аказаўся палітычным: 14 гадоў калоніі ўзмоцненага рэжыму, буйны штраф і шматмільённая кампенсацыя таемнай «шкоды дзяржаве».

Лукашэнкаўскі суд прызнаў палітыка вінаватым паводле двух артыкулаў Крымінальнага кодэкса: «атрыманне хабару ў асабліва буйным памеры» (ч. 3 арт. 430) і «легалізацыя сродкаў, атрыманых злачынным шляхам» (ч. 2 арт. 235). Ён адзіны з васьмі абвінавачаных па справе «Белгазпрамбанка» не прызнаў віны па ўсіх эпізодах абвінавачання.

Ужо больш за год сваякі не атрымліваюць ніякай інфармацыі пра Віктара Бабарыку. Рэжым стварыў для яго так званае «інкамунікада» — поўную інфармацыйную блакаду.

Летась паведамлялася пра шпіталізацыю палітыка пасля збіцця ў наваполацкай калоніі. Паводле сведчанняў вязныў, якія вызваліліся з гэтай установы, за час зняволення Віктар Бабарыка моцна змяніўся, пахудзеў, мае праблемы са здароўем.

Эдуард Бабарыка пасля затрымання амаль тры гады правёў у СІЗА без суда і следства. Суд пачаўся ў траўні 2023 года і прызначыў яму 8 гадоў пазбаўлення волі паводле трох крымінальных артыкулаў. Як і бацька, віну Эдуард не прызнаў.