Чэхія па праграме МЗС прыме 500 беларусаў і расійцаў, якія пераследуюцца ўладамі

Міністэрства замежных спраў Чэхіі апублікавала праграму «Грамадзянская супольнасць», у рамках якой краіна мае намер прыняць беларусаў і расійцаў, якія пераследуюцца ўладамі. У краіне гатовыя прыняць 500 чалавек. Як сказана ў паведамленні МЗС, мэта праграмы — дапамагчы актывістам пакінуць краіну з меркаванняў бяспекі.

Праграма будзе рэалізоўвацца на працягу года, прыём дакументаў ужо пачаўся (з 20 траўня).

МЗС Чэхіі паведамляе, што ў праграму могуць быць уключаныя грамадзяне Беларусі і Расіі, якія з'яўляюцца грамадскімі актывістамі, праваабаронцамі, супрацоўнікамі незалежных медыя, навукоўцамі, і іншымі прадстаўнікамі грамадзянскай супольнасці, якія пераследуюцца ўладамі на радзіме.

Асобы, якія адпавядаюць крытэрам удзелу ў праграме, а таксама іх блізкія сваякі, змогуць звярнуцца з заявай у чэшскую амбасаду. Іх зварот у спрошчаным парадку разгледзяць на працягу месяца.

Нагадаем, пасля пачатку расійскага ўварвання ва Украіну Чэхія не выдае візы беларусам і расійцам.

Нядаўна ўлады Чэхіі прапанавалі падоўжыць забарону на выдачу віз і ВНЖ для грамадзян Беларусі і Расіі да канца сакавіка 2023 года.

Паводле refom.by.