Свабода ад Пуціна. ЕС пераходзіць на электракары

Еўрасаюз адмаўляецца ад аўто з рухавікамі ўнутранага згарання

Еўрапейцы хочуць вызваліцца ад залежнасцяў — як ад нафты і газу, так і ад дэспатаў, пішуць у прэсе, паведамляе Корреспондент.net. Volkswagen назваў адмову ад такіх аўто "амбіцыйнай, але дасягальнай мэтай".

Продажы новых аўтамабіляў з рухавікамі ўнутранага згарання павінны скончыцца ў краінах Еўрасаюза ў 2035 годзе. За такое рашэнне, якое распаўсюджваецца на легкавыя машыны і лёгкі камерцыйны транспарт, прагаласаваў Еўрапарламент.

Што вырашылі еўрапейскія заканадаўцы

Дэпутаты Еўрапейскага парламента падтрымалі прапанову Еўракамісіі, накіраваную на дасягненне нулявых выкідаў для легкавых аўтамабіляў і фургонаў да 2035 года.

Забарону на будучы продаж аўтамабіляў з бензінавымі і дызельнымі рухавікамі падтрымалі 339 парламентарыяў, 249 прагаласавалі "супраць", яшчэ 24 устрымаліся.

Частка парламентарыяў прапаноўвала больш мяккі варыянт закона, які дазволіў бы выкарыстаць гібрыдныя рухавікі, аднак гэтыя папраўкі ў выніку не падтрымалі.

Еўрапейскія заканадаўцы таксама паставілі прамежкавую мэту па зніжэнні выкідаў — на 55 працэнтаў для аўтамабіляў і 50 працэнтаў для фургонаў у 2030 годзе ў параўнанні з 2021 годам. Раней гэты мэтавы паказчык складаў 37,5 працэнта. Усяго на аўтамабілі прыпадае 12 працэнтаў выкідаў вуглякіслага газу ў Еўрасаюзе.

У прэс-рэлізе Еўрапарламента ўдакладняецца, што прыняты ў сераду, 8 чэрвеня, тэкст стане асновай для перамоваў з дзяржавамі-чальцамі ЕС.

Міністры навакольнага асяроддзя сустрэнуцца на саміце ў Люксембургу ў канцы чэрвеня.

Зрэштызабарона на продаж новых аўтамабіляў з рухавікамі ўнутранага згарання на тэрыторыі Еўрасаюза не будзе азначаць адначасова і забароны на іх вытворчасць еўрапейскімі аўтабудаўнікамі.