Экс-журналіст «Трыбуны» Андрэй Маслоўскі знаходзіцца на Акрэсціна. Яго будуць судзіць

Былы карэспандэнт спартыўнага выдання Tribuna.com Андрэй Маслоўскі знаходзіцца ў ІЧУ на Акрэсціна і чакае суду па адміністрацыйнай справе.

Напярэдадні стала вядома, што ў кватэры Андрэя Маслоўскага сілавікі зладзілі ператрус. Пасля гэтага з ім правялі гутарку супрацоўнікі ГУБАЗіКа, а затым затрымалі.

Андрэй Маслоўскі працаваў у рэдакцыі «Трыбуны» з 2010 года, а сёлета ў ліпені звольніўся па пагадненні бакоў.

Раней сілавікі затрымлівалі журналіста спартыўнага медыя Дзмітрыя Рута, якога суд пакараў 15 суткамі адміністрацыйнага арышту за чырвона-белы шалік заўзятара, знойдзены ў яго аўтамабілі.

Следам схапілі журналіста і форварда футбольнага клуба «Крумкачы» Аляксандра Івуліна, якога летась пакаралі штрафам за ўдзел у акцыі пратэсту.

Спачатку ён адседзеў 30 сутак быццам за «забаронены сцяг на акне», а потым яго перавялі ў мінскае СІЗА №1, абвінаваціўшы ў «арганізацыі і падрыхтоўцы беспарадкаў». Правабаронцы прызналі Аляксандра Івуліна палітвязнем.

Таксама ў пачатку верасня адбыўся ператрус у кватэры аднаго з кіраўнікоў спартыўнага партала Максіма Беразінскага. Сам журналіст знаходзіцца па-за межамі Беларусі.

Паводле «Свабоды».