«Галоўнае — захаваць сумленне». З ФК «Дынама» (Мінск) сыходзяць два спецыялісты

Клуб пакідаюць прэс-сакратар Аляксандр Строк і спецыяліст па маркетынгу Аляксей Селівончык. Абодва падпісвалі ліст за новыя выбары і супраць гвалту.

Прэс-сакратар мінскага «Дынама» Аляксандр Строк і спецыяліст па маркетынгу Аляксей Селівончык пакідаюць клуб, паведамляе «Трыбуна». Абодва з'яўляюцца падпісантамі жнівеньскага ліста за новыя выбары і супраць гвалту.

Тыдзень таму Аляксандр Строк напісаў пост у Instagram:

«Менавіта гэты год атрымаўся самым цяжкім, як і для абсалютнай большасці беларусаў. Мы шмат чаго перажылі, на многае сталі глядзець зусім іншымі вачыма, у многіх з нас унутраны свет змяніўся максімальна крута, і ён больш ніколі не будзе ранейшым. Мы ўсе (амаль) вельмі пасталелі.

Тым не менш у гэтым кругавароце абсалютна розных падзей я пераканаўся ў адным. Галоўнае — гэта захаваць сваё сумленне чыстым. Як бы ні было дрэнна (с). Нягледзячы ні на што, я рады, што мне гэта ўдалося.

Было цяжка, а будзе яшчэ цяжэй, але мне грэх на нешта скардзіцца. Я жывы і здаровы, таму сёння хачу сказаць дзякуй усім, хто застаецца побач. Беражыце сябе і сваіх блізкіх!» — напісаў Аляксандр Строк.