Хронікі рэпрэсій. 16 гадоў «рэйкаваму партызану», «хатняя хімія» сям'і за фота з кнігі
З дапамогай інфармацыі праваабаронцаў і незалежных СМІ сабралі звесткі пра палітычны пераслед беларусаў 22 снежня.
«Рэйкаваму партызану» Віталю Мельніку, якому пры затрыманні прастрэлілі калені, прысудзілі 16 гадоў калоніі ва ўмовах строгага рэжыму. Таксама ён мусіць выплаціць 300 базавых штрафу.
Вядома, што
мужчына пражывае ў вёсцы Хадакова Мінскага раёна, у яго ёсць маленькае дзіця.
Сям'я лічыць, што Віталь не мае дачынення да прад'яўленых артыкулаў, і звязвае
яго затрыманне з помстай мясцовага суддзі, а таксама з тым, што раней у Віталя
была судзімасць. Пасля ранення пры затрыманні ён дагэтуль перасоўваецца на мыліцах.
У судзе Партызанскага раёна Мінска па «народным» артыкуле 342 Крымінальнага кодэкса («Актыўны ўдзел у дзеяннях, якія груба парушаюць грамадскі парадак») асудзілі да трох гадоў «хатняй хіміі» сямейную пару, Дар'ю і Міхаіла Суднікаў. Іх абвінавацілі ў перакрыцці дарог на адным з Маршаў у 2020 годзе. Галоўны доказ па справе — фота з плакатам з кнігі «Я выхожу».
Стала вядома, што 5 снежня жыхара Пінска Вячаслава Аўчука асудзілі да двух гадоў абмежавання волі без накіравання ў ПУАТ (да «хатняй хіміі») паводле арт. 368 («Абраза Лукашэнк»і) КК. Ягоны мабільны тэлефон пастанавілі канфіскаваць, а сім-картку — «знішчыць».
Да суда Вячаслаў знаходзіўся на волі, ён быў затрыманы на трое сутак з 9 па 12 верасня 2022 года. Яго прызналі вінаватым у тым, што 1 сакавіка 2021 года ён пакінуў каментар у адрас Лукашэнкі ў сацсетцы «ВКонтакте» пад ягоным фотаздымкам, ужыўшы ненарматыўную лексіку.
У судзе Мінскага раёна ў канцы лістапада адбыўся суд над маляром аднаго з прадпрыемстваў у Мінскім раёне, якога абвінавацілі ў «несанкцыянаваным пікетаванні» паводле арт. 24.23 КаАП. Згодна з пратаколам, ён размясціў на шафе для пераапранання налепку з бел-чырвона-белым сцягам, «публічна выказваючы свае грамадска-палітычныя інтарэсы».
На судзе мужчына не прызнаў сваёй віны і сцвярджаў, што налепку размясціў невядомы чалавек, таму ў яго не было мэты выказваць свае погляды. У выніку суд прызнаў мужчыну вінаватым у пікетаванні і арыштаваў мужчыну на 13 сутак.
Палітвязню Віктару Шауру, якому раней замянілі «хімію» на калонію, збіраюцца ўзмацніць пакаранне.
Віктара Шауру і Віталя Шыцікава абвінавацілі ў «актыўным удзеле ў групавых дзеяннях, якія груба парушаюць грамадскі парадак» за падзеі 10 жніўня ў Наваполацку. 21 студзеня 2021 года хлопцаў асудзілі да 2 гадоў «хіміі» па арт. 342 КК.
У чэрвені 2021 года Віктара і Віталя выпусцілі з «хіміі» пад падпіску аб нявыездзе да паўторнага апеляцыйнага суда. Але 22 ліпеня падчас суда па пратэсце пракурора абодвум хлопцам «хімію» замянілі на калонію — на 2 і 2,5 года пазбаўлення волі ва ўмовах агульнага рэжыму адпаведна.
Віктар адбывае тэрмін у папраўчай калоніі № 22. Стала вядома, што заўтра адбудзецца суд аб пераводзе яго ў папраўчую ўстанову іншага тыпу і змене ўмоў рэжыму. Справу будзе разглядаць суддзя Аляксандр Кірыловіч.
Берасцейца Івана Соўпеля перад днём народзінаў змяшчалі ў ШІЗА. Палітвязня асудзілі па крымінальнай справе аб масавых беспарадках (ч. 2 арт. 293 КК) за падзеі 10 жніўня 2020 года ў Брэсце. Іван быў на волі пад падпіскай аб нявыездзе, але 22 сакавіка 2021 года яго выклікалі да следчага і там затрымалі. Меру стрымання змянілі на ўтрыманне пад вартай.
8 лістапада 2021 года ў судзе Ленінскага раёна Брэста яму прызначылі чатыры гады калоніі ўзмоцненага рэжыму. З 19 студзеня ён адбывае тэрмін у бабруйскай калоніі.
Стала вядома, што адміністрацыя калоніі ў канцы лістапада закінула палітвязня ў ШІЗА, але тэрмін і прычыны невядомыя.
У Беларусі восем новых палітвязняў: Руслан
Сінкевіч, Дзмітрый Мядзведскі, Юрый Трапачоў, Сяргей Рабцаў, Артур Пядзько,
Сяргей Нялепка, Аляксандр Дураеў, Уладзіслаў Савін. Усяго ў спісах праваабаронцаў цяпер 1442 палітычныя зняволеныя, але насамрэч іх нашмат больш.
Бацька семярых дзяцей палітвязень Максім Лацунцэвіч выйшаў на волю. У Мінскім гарадскім судзе 25 лістапада яму прысудзілі 1 год і 10 месяцаў калоніі. Яго прызналі вінаватым паводле арт. 130 («Распальванне сацыяльнай варожасці») КК, а таксама паводле арт. 369 («Абраза прадстаўніка ўлады») КК. Таксама ён мусіць выплаціць штраф у памеры 100 базавых велічынь (3200 беларускіх рублёў).
Максім быў затрыманы 29 верасня 2021 года ў межах «справы Зельцэра». Такім чынам, з улікам тых дзён, што ён ужо правёў у зняволенні, яму заставалася быць за кратамі крыху менш за месяц. Сёння тэрмін скончыўся.