Хронікі рэпрэсій за 5 снежня: Эдуарда Бабарыку залічылі да «тэрарыстаў»

Грамадства

У Беларусі па-ранейшаму працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць «экстрэмісцкімі» матэрыяламі і фармаваннямі,  паведамляюць  праваабаронцы.

hroniki_represij2_logo.png_logo_1.webp
  • Новыя экстрэмісты

Беларускі спартыўны праект «Tribuna» прызнаны «экстрэмісцкім фарміраваннем». Адпаведнае рашэнне прынятае МУС 5 снежня.

Таксама «экстрэмісцкімі фарміраваннямі» прызнаныя праекты «6TV Bielarus» і BelPol

У рашэнні КДБ, адносна прызнання «6TV Bielarus» фігуруюць прозвішчы людзей, нібыта датычных да праекту: Салаўёў Дзмітрый Віктаравіч, Лапцэвіч Уладзімір Пятровіч, Буракоў Аляксандр Уладзіміравіч.

Да арганізацыі BelPol, згодна з рашэннем КДБ, адносяцца: Астаповіч Андрэй Ігаравіч, Жыгар Уладзімір Міхайлавіч, Купрэйчык Мацвей Дзмітрыевіч, Кабанаў Аляксандр Аляксандравіч.

Тэлеграм-канал «Беларускай Рада культуры» прызнаны «экстрэмісцкім». Адпаведнае рашэнне прынятае судом Баранавіцкага раёна і горада Баранавічы 4 снежня.

Таксама «экстрэмісцкі» спіс папоўніла Tiktok-старонка «klimzlobich». 

  • Эдуарда Бабарыку ўнеслі ў «спіс тэрарыстаў»

Камітэт дзяржаўнай бяспекі абнавіў спіс «асоб, якія маюць дачыненне да тэрарыстычнай дзейнасці» — там з'явіліся прозвішчы яшчэ сямі чалавек.

Сярод іх 22-гадовы Максім Варнель, 46-гадовы Кірыл Крошкін, 44-гадовы Аляксандр Сігневіч, 52-гадовая Кацярына Джыг, былы сілавік Іван Янчук, сын прэтэндэнта ў кандыдаты на пасаду прэзідэнта Эдуард Бабарыкі, жыхар Чыжоўкі Яўген Верхаводкін. 

Цяпер у «тэрарыстычным спісе» 1145 чалавек, з іх 390 — беларусы (адзначым, што ў спісе КДБ 1154 пазіцыі, аднак 9 чалавек з яго былі выдаленыя раней). 

  • У Мінску за «фінансаванне дзейнасці экстрэмісцкага фармавання» пачынаюць судзіць SEO-менеджарку

42-гадовую палітзняволеную SEO-менеджарку Анастасію Пакаташкіну затрымалі 10 красавіка 2023 года і змясцілі пад варту ў жодзінскую турму.

5 снежня Анастасію пачалі судзіць у Мінскім гарадскім судзе паводле арт. 361-2 КК (фінансаванне дзейнасці экстрэмісцкага фарміравання). Сутнасць справы пакуль невядомая. Справу вядзе Сяргей Кацэр.  

  • Мінскага менеджара-эканаміста асудзілі да двух гадоў калоніі

Суд Фрунзенскага раёна Мінска асудзіў 35-гадовага менеджара-эканаміста Юрыя Дабрахотава да 2 год калоніі за актыўны удзел у групавых дзеяннях, якія груба парушаюць грамадскі парадак і спалучаных з непадпарадкаваннем супрацоўнікам міліцыі (ч. 1 арт. 342 КК), а таксама за выраб, набыццё і захоўванне наркатычных рэчываў (ч. 1 арт. 328 КК). «Наркатычны» артыкул першапачаткова ў справе не фігураваў і з’явіўся толькі падчас судовага пасяджэння.

Справу, у якой шмат нестыковак, разглядала суддзя Юлія Крэпская.

Вядома, што пра затрыманні Юрыя збівалі супрацоўнікі міліцыі — яны казалі яму нешта, але ў сувязі з праблемамі са слыхам і шокам, мужчына сэнс слоў не разумеў. 

  • У Глыбоцкім раёне на 8 сутак арыштавалі грамадзянку Расіі за лайкі ў «Аднакласніках» 

Паводле звестках віцебскіх праваабаронцаў, Алена Крыўко паходзіць з Прыморскага краю, але даўно жыве ў Беларусі.

На яе старонцы ў «Аднакласніках» нібыта знайшлі БЧБ-сцяг і некалькі лайкаў у «экстрэмісцкіх» суполках. Судовы працэс у дачыненні да 61-гадовай жанчыны разглядаў суддзя Аляксандр Алексяенка. 

  • Пасля доўгага перапынку аднавіўся суд над палітвязнем Яраславам Саковічам

Яраслаў Саковіч быў затрыманы 5 жніўня 2022 года. Да 2021 года ён жыў ва Украіне, жанаты на ўкраінцы.

Пасля вяртання ў Беларусь быў затрыманы супрацоўнікамі КДБ, якія катавалі яго і выбівалі прызнанне ў тым, што ён раней ваяваў ва Украіне.

Пазней яго адпусцілі, але праз год затрымалі ўжо ў межах крымінальнай справы.

У Мінску 4 траўня яго асудзілі да двух гадоў пазбаўлення волі паводле двух артыкулаў Крымінальнага кодэксу. Але ў жніўні Яраслава пачалі судзіць ужо за «здраду дзяржаве» паводле арт. 356 КК.

Меркавана, з 11 верасня ў судзе быў абвешчаны перапынак, але сёння судовыя пасяджэнні аднавіліся. 

  • ГУБАЗіК затрымаў айцішніка, які нібыта заклікаў «закідваць сілавікоў фекаліямі»

Таксама праўладныя тэлеграм-каналы сцвярджаюць, што мужчына пасля пачатку вайны ва Украіне пісаў абразлівыя каментары пра расійскіх салдат. 

  • Былых палітвязняў Анастасію Малашук і Аляксея Кедыша арыштавалі на 5 сутак

Інфармацыя пра гэта з'явілася на Instagram-старонцы брэнда piuceramics.

«Мы з мужам зараз з'язджаем на 5 сутак арышту ў Акрэсціна (такое рашэнне інспекцыі). У сувязі з гэтым вымушаная адмена заняткаў і наведванняў майстэрні. Вернемся да працы ў панядзелак 11 снежня».

Нагадаем, керамістку і заснавальніцу брэнда piuceramics Анастасію Малашук і яе мужа Аляксея Кедыша абвінавацілі паводле арт. 342 КК (удзел у дзеяннях, якія груба парушаюць грамадскі парадак) і асудзілі да 3 гадоў «хатняй хіміі».