Берасцеец звярнуўся ў камісію па вяртанні і атрымаў год калоніі
У судзе Маскоўскага раёна Брэста да аднаго года калоніі паводле ч.1 арт.368 Крымінальнага кодэкса («Абраза Лукашэнкі») асудзілі 30-гадовага Ігара Неміровіча. Справу за фота з «абразлівым надпісам» у Instagram разглядалі наўпрост у берасцейскім СІЗА. Пры гэтым у пастанове суда адзначана, што працэс «праходзіў у адкрытым рэжыме».
Ігар Неміровіч
Вядома, што берасцеец вярнуўся ў Беларусь праз зварот у камісію па вяртанні, але гэта не выратавала яго ад пераследу. Прысуд вынесла Марыя Аліфярук.
Першы раз Ігара Неміровіча затрымалі ў пачатку траўня 2022 года і адразу змясцілі пад хатні арышт, але ён збег і з'ехаў, піша «Вясна». Восенню гэтага года ён звярнуўся ў камісію па разглядзе зваротаў беларусаў, якія знаходзяцца за мяжой, і вярнуўся дадому.
Але гэты факт не прызналі «безумоўнай падставай для вываду аб яго раскаянні». 27 верасня 2023 года яго зноўку затрымалі і змясцілі пад варту.
Згодна з версіяй абвінавачання, 10 жніўня 2020 года Ігар Неміровіч размясціў у Instagram фота з тэкстам у «непрыстойнай форме, што прыніжае гонар і годнасць Аляксандра Лукашэнкі, якое змяшчала негатыўную ацэнку і з'яўлялася абразлівым у адносінах да яго».
На працэсе Ігар віну прызнаў цалкам і распавёў, што з траўня па жнівень 2020 года ён не жыў у Беларусі. Пра падзеі, якія адбываліся на радзіме, берасцеец даведваўся са сродкаў масавай інфармацыі. «Паддаўшыся негатыўным эмоцыям ад асвятляемых падзей», ён размясціў у сацыяльнай сетцы Instagram фотавыяву «абразлівага характару» ў дачыненні да Аляксандра Лукашэнкі. Раней, пры допыце яго ў якасці абвінавачанага, ён адмаўляў сваё дачыненне да гэтага, «паколькі баяўся магчымага наступу крымінальнай адказнасці».
Але, паводле Неміровіча, па сканчэнні пэўнага часу ён усё пераасэнсаваў.
З матэрыялаў справы стала вядома, што выяву з Лукашэнкам міліцыянты знайшлі ў Instagram на старонцы Неміровіча 28 сакавіка 2022 года, бо тая сторыз ад 10 жніўня 2020 года была замацавана ў «актуальных». Менш чым за месяц была праведзена экспертыза, якая паказала, што ў скрыншоце гісторыі ўтрымліваецца «негатыўна ацэнка Лукашэнкі».
У выніку суддзя Марыя Аліфярук прызначыла Ігару Неміровічу адзін год калоніі ва ўмовах агульнага рэжыму.
Падтрымайце вязня: СІЗА-7, 224030, г. Брэст, вул. Савецкіх памежнікаў, 37, Ігар Міхайлавіч Неміровіч
Глядзіце таксама
