Лукашэнка не можа спаць з-за ЦТ і патрабуе «нешта зварыць» з яго да канца года

Аляксандр Лукашэнка заявіў, што не можа спаць з-за таго, што яго хвалюе праблема цэнтралізаванага тэставання. Пра гэта ён распавёў удзельнікам нарады па інтэграцыі біялогіі і медыцыны.

«Мяне гэтая праблема пастаянна хвалюе. Шчыра кажучы, я спаць не магу з-за гэтага ЦТ, наколькі яно адпавядае таму ўзроўню, што нам патрэбны пры адборы лепшых хлопцаў у ВНУ. Шчыра скажу, вельмі пакуль я крытычна стаўлюся да гэтай арганізацыі ўступных выпрабаванняў нашых маладых людзей. Але і ў ЦТ, мы бачым гэта, ёсць вельмі шмат станоўчага. Вось што рабіць на сённяшні дзень? Гэта апошні год, калі мы павінны даць адказ на гэтае пытанне», — прызнаўся Лукашэнка.

Магчыма цяжкасці са сном звязаныя з тым, што яго малодшы сын Мікалай у гэтым годзе скончыў сярэднюю школу. Вядома, што Мікалай цікавіцца біялогіяй і медыцынай, адзначае REFORM.by.

Лукашэнка растлумачыў, чаму запрасіў рэктара БДУ і дэкана біялагічнага факультэта: «Мы паспрабавалі (вы таксама займаліся гэтым спецыфічным метадам, не будзем пакуль пазначаць гэта) адабраць хлопцаў самых лепшых для таго, каб яны маглі займацца адпаведнымі навукамі. Перш за ўсё біялагічныя, звязаныя з аховай здароўя, навукай, іншымі распрацоўкамі. Мы паспрабавалі іншыя метады. Натуральна, гэта невялікая колькасць людзей. І я перакананы, што там адабраны лепшыя. Таму што ўсе ж да адбору бралі тых, хто на алімпіядах ужо перамагаў. Гэта хлопцы ўжо прасунутыя. Іх галоўнае не страціць для краіны. Але вось ужо сутыкнуліся з першым вопытам».

Вяртаючыся да ЦТ, Лукашэнка заявіў, што трэба нешта зварыць да канца года.

«Гэта значыць уступныя выпрабаванні павінны быць у Беларусі аптымальныя. Мы адышлі ад гутарак рознага роду (як мы з вамі калісьці здавалі гэтыя экзамены), прыйшлі да ЦТ. Убачылі там мінусы, тут плюсы і наадварот. Трэба нешта зварыць да канца года. І ў будучым годзе, канчаткова прыняўшы рашэнне, грамадству паказаць. Гэта найважнейшы пытанне — уступная кампанія, як мы будзем яе праводзіць ужо з наступнага года. Вось гэта вельмі важна. І ў гэта вы пагружаныя, усе чацвёра, больш, чым хто-небудзь. Трэба падцягнуць яшчэ спецыялістаў, параіцца і зрабіць канчатковыя высновы», — патлумачыў ён.

У сваю чаргу міністр адукацыі Андрэй Іванец далажыў, што ЦТ стартавала 14 чэрвеня, на яго запісалася больш за 62 тысячы чалавек (прыкладна столькі ж, колькі і ў мінулым годзе). Міністр адзначыў адчувальны рост колькасці тых, хто зарэгістраваўся на здачу ЦТ па матэматыцы і фізіцы.

«Выдатна», — адрэагаваў Лукашэнка.