Пенсіянерам не далі прайсці Маршам мудрасці ў Мінску, затрымалі 10 чалавек, сярод іх — журналісты (фота, відэа)

Сённяшні марш мудрасці — 10-ты па ліку. Яго маршрут застаецца традыцыйным: шэсце па цэнтры горада. Але памяняліся пачатковы і канчатковы пункты: калі раней марш стартаваў ад плошчы Незалежнасці і заканчваўся на плошчы Якуба Коласа, то сёння — наадварот, пенсіянеры пачалі збірацца на Коласа, каб дайсці да Незалежнасці.
Фота Радыё Свабода

Фота Радыё Свабода

13.30. Падчас Маршу мудрасці ў Мінску затрымалі прынамсі 10 чалавек, удакладняе «Радыё Свабода».

Журналістку тэлеканалу «Белсат» Любоў Лунёву і аператара Івана Куракевіча затрымалі перад пачаткам марша ў Мінску. Пра гэта Лунёва паспела паведаміць Свабодзе па тэлефоне: «Марш яшчэ не пачаўся, на нас накінуліся шэсць сілавікоў у чорным. Мы спрабавалі схавацца ў краме, але не ўдалося».

Цяпер Лунёва знаходзіцца ў ізалятары на Акрэсціна: «Нас тут агулам 10 чалавек прывезлі з маршу пенсіянераў. Афармляюць».

13.22. Некалькі фота сённяшняй акцыі пенсіянераў ад tut.by. Як паведамляе партал, на плошчы Якуба Коласа пачаліся кропкавыя затрыманні ўдзельнікаў. Частцы з іх удалося пакінуць плошчу.


13.07.
 На Маршы мудрасці затрымалі журналістку і аператара «Белсату» Любоў Лунёву і Івана Куракевіча. Tut.by піша пра затрыманне адной пажылой удзельніцы маршу, паведамляе «Радыё Свабода». 

«Белсат» перадае, што цяпер яны на Акрэсціна.

12.50.
Людзі на плошчы Якуба Коласа разбіліся на групы, да іх падыходзяць сілавікі ў чорным і выціскаюць з плошчы. Пенсіянеры разыходзяцца. Затрыманняў не заўважана.

12.40. Пенсінянераў фактычна заблакавалі на плошчы Якуба Коласа, шмат сілавікоў у чорным і мікрааўтобусаў, яны не даюць прайсці пенсіянерам. Тратуары перакрытыя вялікімі жоўтымі аўтобусамі і сілавікамі ў чорным. Людзі не могуць нікуды рушыць.

12.34. Сілавікі не даюць пенсіянерам выйсці з плошчы Якуба Коласа і рушыць па праспекце, перадае «Наша Ніва». На плошчы не спыняюцца трамваі, праспект перакрыты.


А вось відэа tut.by, на якім бачна, што людзям не даюць пачаць шэсце:


12.30. У Маршы бяруць удзел некалькі соцень чалавек,паведамляе «Радыё Свабода», сілавікі перакрылі бліжэйшыя ад плошчы Якуба Коласа выхады з метро. Міліцыя папярэджвае, што іх мітынг незаконны, людзі адказваюць, што ім часам не да законаў, як казаў у разгар палітычнага крызсіу Лукашэнка.

12.11. Невялікая калона тых, хто сабраўся на плошчы Якуба Коласа, пачала рух у кірунку плошчы Перамогі. Міліцыянт папярэджвае па гучнагаварыцелі, што дзеянні грамадзян несанкцыянаваным, паведамляе onliner.by.

У мінулы панядзелак сілавікі толкам не далі сабрацца сталым людзям, калоны адсякалі, адбываліся затрыманні. Сёння пад'езды да плошчы Якуба Коласа перакрыла ДАІ, заўважаны аўтобусы з сілавікамі.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: