«Мінсктранс» патрабуе 22 тысячы рублёў у пратэстоўцаў за «перакрыццё дарог» у ноч на 11 жніўня каля «Рыгі»

У мінскіх судах працягваюць разглядаць грамадзянскія пазовы «Мінсктранса» да асуджаных палітвязняў з патрабаваннем кампенсаваць шкоду за «перакрыццё дарог» на пратэстах.

На гэтым тыдні судзіліся мінімум з двума асуджанымі пратэстоўцамі: Дзмітрыем Дубковым і Дзянісам Чыкалёвым, піша «Вясна».

Суд з Дзмітрыем Дубковым

9 ліпеня ў судзе Савецкага раёна Мінску разгледзелі пазоў «Мінсктрансу» да палітвязня Дзмітрыя Дубкова. Сума пазову да асуджанага на 7 гадоў калоніі ўзмоцненага рэжыму пратэстоўца складае 21 861,69 рублёў за блакаванне дарог у ноч на 11 жніўня 2020 году.

На судзе прысутнічаў юрысконсульт «Мінсктрансу», які заявіў хадайніцтва аб’яднаць справу з пазовам у дачыненні да Івана Красоўскага. На судзе патлумачылі, што 21 861,69 рублёў — гэта сума шкоды за прастой усяго транспарту 10 і 11 жніўня, звязаны з несанкцыянаванымі масавымі акцыямі. Таму гэтую суму будуць дзяліць на ўсіх пратэстоўцаў, асуджаных за «перакрыццё дарог» у гэтыя дні. Суд задаволіў хадайніцтва «Мінсктрансу».

Сам Дзмітры Дубкоў не ўдзельнічаў у пасяджэнні, бо адбывае сямігадовае пакаранне ў папраўчай калоніі № 22 у Івацэвічах за тое, што ў ноч на 11 жніўня на вуліцы Прытыцкага ён «па папярэдняй дамове з нявызначанымі асобамі пранік у кабіну МАЗ, завалодаў транспартным сродкам і запусціў рухавік». Яго інтарэсы прадстаўляў адвакат, які на судзе заявіў, што Дубкоў не прызнае пазоў, бо ягоныя дзеянні не прывялі да спынення руху транспарту. Як і напісана ў прысудзе, Дзмітры паставіў аўтамабіль тэхдапамогі ў трэцяй паласе ў 23:14. Рух быў перакрыты супрацоўнікамі АМАПу, астатнія палосы былі перагароджаныя, на дарозе знаходзіліся людзі.

Суддзя прыпыніла працэс да ўступлення ў законную сілу прысуду ў дачыненні да Яраслава Збароўскага, асуджанага да 3 гадоў «хіміі» за блакаванне дарогі ўласнай машынай і ўзвядзенне барыкадаў у ноч на 11 жніўня каля ГЦ «Рыга». Мяркуецца, што працэс працягнецца ў жніўні.

Суд з Дзянісам Чыкалёвым

9 ліпеня ў судзе Фрунзенскага раёну Мінску разглядаўся пазоў «Мінсктрансу» да асуджанага на тры гады «хіміі» па ч. 1 арт. 342 Крымінальнага кодэксу гамельчука Дзяніса Чыкалёва. Справу разглядаў суддзя Мікалай Багамякаў, які ў гэтым судзе разглядае аналагічныя пазовы да ўсіх палітвязняў.

Паводле матэрыялаў справы, Чыкалёў увечары 9 жніўня парушыў працу аднаго аўтобуса (№ 163), за гэта «Мінсктранс» выставіў яму пазоў на суму 6 126 рублёў і 81 капейку.

Вядома, што такую ж суму шкоды выставілі і палітзняволенаму Лявону Халатарану.