Нумізматычны скарб на беларуска-польскай мяжы

Кантрабанду царскіх манет васямнаццатага стагоддзя спынілі на пераходзе ў Палоўцах — Пяшчатцы польскія мытнікі.

Манеты хацеў правезці ў Польшчу 43-гадовы  грамадзянін Беларусі. Супрацоўнікі мытні знайшлі ў яго машыне сховішча над коламі і ў падлозе багажніка.

Аказалася, што ўнутры знаходзіліся 680 манетаў наміналам 5 капеек. Як кажа Мацей Чарнэцкі з прэ-службы Беластоцкай казначэйскай адміністрацыі, эксперты па археалогіі і нумізматыцы пацвердзілі высокую вартасць манет:

— Манеты часоў праўлення Кацярыны ІІ — гэта антыкварныя прадметы высокай гістарычнай каштоўнасці. Іх рынкавая цана вагаецца ад некалькіх дзясяткаў да некалькіх соцень злотых. Адзінкавыя, найбольш добра захаваныя экземпляры, ацэнены спецыялістамі нават больш чым у дзве тысячы злотых.

Спачатку мужчына гаварыў, што не ведае нічога пра схаваныя ў яго машыне манеты. Потым, аднак, прызнаў сваю віну.

Беластоцкія функцыянеры пачалі супраць беларуса справу, а манеты канфіскавалі. 

Лукаш Леанюк, Беларускае Радыё Рацыя

 Фота podlaskie.kas.gov.p