У Ліцэі БДУ прайшлі масавыя чысткі выкладчыкаў
З Ліцэя БДУ, які ў 2020 годзе асудзіў гвалт сілавікоў, «сышлі» дзесяць выкладчыкаў, паведамляе «Люстэрка». Паводле інфармацыі дзвюх не звязаных паміж сабой крыніц, педагогам не працягнулі кантракты.
«19 чэрвеня з Ліцэя БДУ звольнілі дзесяць выкладчыкаў», — паведаміў адзін з чытачоў выдання.
Інфармацыю аб сыходзе дзясятка настаўнікаў пацвердзіла і
экс-педагог Ліцэя. Паводле яе слоў, нядаўна супрацоўнік КДБ правёў асабістую
гутарку з работнікамі ўсіх кафедраў. Пасля гэтага з'явіліся спісы, з кім не
працягнуць кантракт.
Паводле слоў крыніц, сярод тых, хто сышоў, ёсць выкладчык
геаграфіі, гісторыі, настаўнік беларускай мовы і літаратуры, арткіраўнік. Паводле даных на чацвер, 22 чэрвеня, імёны гэтых настаўнікаў былі пазначаны на сайце
навучальнай установы.
У прыёмнай Ліцэя БДУ, куды журналісты выдання патэлефанавалі як занепакоеныя
бацькі, сказалі, што ўпершыню чуюць пра тое, што з навучальнай установы
сыходзяць дзесяць выкладчыкаў. Спецыяліст удакладніла, што не можа ні
пацвердзіць, ні абвергнуць гэту інфармацыю.
«Выкладчыкі, як і ўсюды — хтосьці сыходзіць, хтосьці
застаецца. У кожнага ёсць свае нейкія прычыны. Хтосьці прыходзіць, хтосьці
сыходзіць. Думаю, у любой установе адукацыі кадры змяняюцца. У кожнага чалавека
ёсць права выбару: застацца, сысці, памяняць працу або працаваць далей», —
патлумачыла сітуацыю суразмоўніца.
Паводле яе слоў, кожны год «хтосьці сыходзіць, хтосьці
прыходзіць» — гэта «нармальная з'ява». Яна таксама адзначыла, што ў Ліцэі вялікі педсастаў: «Гэта не 20 чалавек і не 15. Тым больш ёсць
сумяшчальнікі».
Усхваляваных бацькоў яна папрасіла не перажываць: «Дзеці не
застануцца без настаўнікаў».
«Людзей з вуліцы не набіраюць, каб вучылі дзяцей. Бяруцца людзі з кваліфікацыяй <...>. Натуральна, гэта людзі, якія
прыходзяць на сумоўе. З імі размаўляюць, глядзяць, наколькі яны нам
падыходзяць, — сказала супрацоўніца прыёмнай. — Гэта нармальны працэс для
любога калектыву. Асабліва вялікага калектыву. Паверце, у нас вялікі калектыў.
Таму тут няма ніякай падставы з-за гэтага перажываць».
Нагадаем, у сакавіку 2023-га тэлеканал «Белсат» са спасылкай
на свае крыніцы заяўляў, што ў навучальнай установе былі складзены тры спісы
нелаяльных педагогаў. Сярод іх:
— непасрэдныя ўдзельнікі пратэстаў;
— асобы, якія данацілі грошы на розныя ініцыятывы;
— тыя, хто ў 2020 годзе ставіў подпісы за альтэрнатыўных прэтэндэнтаў у прэзідэнты.
Паведамлялася, што іх плануюць звольніць па сканчэнні кантрактаў, каб не зрываць працу Ліцэя.
У снежні 2022-га ў інтэрв'ю «Нашай Ніве» экс-дырэктар Ліцэя
БДУ Ігар Варакса распавёў, што з лета 2021-га, калі ён пакінуў навучальную
ўстанову, паводле яго падлікаў, сышлі самастойна або былі звольнены 12
супрацоўнікаў.