Крыніцы: У Віктара Бабарыкі можа быць інсульт
Пра тое, што ў палітвязня і былога кандыдата ў прэзідэнты Віктара Бабарыкі мог здарыцца інсульт, «Нашай Ніве» паведаміў былы палітзняволены Валянцін Лабачоў.
Фота прэс-службы Віктара Бабарыкі
Сам Валянцін даведаўся пра гэта ад сваякоў аднаго з палітвязняў.
«Віктар Бабарыка, магчыма, перанёс інсульт і ў яго прабіта лёгкае», — расказваюць вязні калоніі.
Яны не ведаюць, якая сувязь паміж інсультам і станам грудной
клеткі.
Паводле інфармацыі з калоніі, Бабарыка дагэтуль не вярнуўся туды.
Сам Валянцін Лабачоў мяркуе, што калі б у Віктара Бабарыкі
ўсё было добра са здароўем, то праўладныя каналы ўжо б паказалі, як ён
выглядае, як гэта было з Марыяй Калеснікавай. «А тут два месяцы нічога не
вядома пра чалавека. Ці значыць гэта, што ён часткова ці поўнасцю
паралізаваны?» — задаецца пытаннем былы палітвязень.
«Бабарыка знаходзіцца ў Калядзічах, у Рэспубліканскім шпіталі
для зняволеных», — мяркуе Валянцін Лабачоў.
Таксама Лабачову расказалі, што Ігар Лосік будзе ў бліжэйшы час пераведзены на турэмны рэжым.
«Таму што ён знаходзіцца ў ПКТ з лютага, а трымаць там
могуць толькі да паўгода, з ПКТ у атрад ужо не вяртаюцца. Таму месяц-два, і ён
будзе ўжо на так званай «крытай турме».
Ужо больш за месяц пра асуджанага на 14 гадоў калоніі
Віктара Бабарыку нічога невядома. Мяркуючы па наяўнай інфармацыі, у ноч з 24
на 25 красавіка яго шпіталізавалі ў бальніцу Наваполацка.
12 мая ад праваабаронцаў з’явілася інфармацыя, што да свайго
атрада ў наваполацкай калоніі ён нібыта ўжо не прыпісаны, а пасля — пра тое,
што яго нібыта перавялі ў турэмную бальніцу пры СІЗА-1 у Мінску. Пасля гэтага
ніякіх звестак не паступала.
17 мая адбылося масавае затрыманне медыкаў у Цэнтральнай
гарадской бальніцы Наваполацка — акурат той, куды даставілі былога прэтэндэнта
на пасаду прэзідэнта і адкуль падпольны «Рабочы рух» атрымаў інфармацыю пра яго
шпіталізацыю. Многім медыкам далі ад 10 да 15 сутак. Некаторым выпісалі штрафы.
У прыватнасці, вядома, што хірурга Міхаіла Пачкоўскага і
ўролага Паўла Стальмакова арыштавалі на 15 сутак, загадчыцу аддзялення
гінекалогіі Ірыну Васільеву і фельчарку хуткай дапамогі Наталлю Первянёнак — на
10 сутак, а спецыялістку УГД Алу Стальмакову аштрафавалі на 100 базавых (3700
рублёў).
Потым медыкаў звольнілі за прагулы, як паведамляў
тэлеграм-канал «Белыя халаты».
Кіраўнік «Белгазпрамбанка» Віктар Бабарыка вылучыў сваю
кандыдатуру на прэзідэнцкія выбары 2020 года і сабраў рэкордную колькасць
подпісаў выбарцаў. Сацыялагічныя даследаванні паказвалі, што ён мае самы высокі
рэйтынг сярод усіх кандыдатаў. Аднак у чэрвені 2020 года лукашэнкаўцы яго
арыштавалі, а Цэнтрвыбаркам адмовіў яму ў рэгістрацыі ў якасці кандыдата.