Адвакат Дзмітрый Лаеўскі: Справядлівасць важная, хоць і праз гады
У ААН зарэгістравана скарга былога адваката Дзмітрыя Лаеўскага. Сама скарга на пазбаўленне прафесіі была пададзена адвакатам яшчэ ў мінулым годзе. Экс-адвакат мяркуе, што рашэнне КПЧ дасць шанс адвакатуры на новае жыццё.
19 чэрвеня Камітэт па правах чалавека ААН зарэгістраваў скаргу Дзмітрыя Лаеўскага з прычыны пазбаўлення яго адвакацкага статусу. Скарга пададзена яшчэ 19 снежня 2022 года — незадоўга да таго, як беларусаў наогул пазбавілі такой магчымасці.
Дзмітрыя Лаеўскага ў ліпені 2021 года выключылі з калегіі адвакатаў, а праз месяц, у жніўні 2021 года, Мінюст пазбавіў яго адвакацкай ліцэнзіі. Адвакат абараняў такіх вядомых палітвязняў, як Віктар Бабарыка і Максім Знак.
— Рэгістрацыя скаргі — важны факт. Гэта азначае, што распачата вытворчасць. Разгледзеўшы скаргу, КПЧ дасць экспертную ацэнку аб тым, ці адпавядае міжнародным абавязацельствам дзяржавы пазбаўленне адваката права займацца адвакацкай практыкай за выказванне ў судзе ў абарону чалавека.
Справядлівасць важная, хоць і праз гады. Не толькі для мяне і абароны майго парушанага права. І не толькі з любові да мастацтва. Але і дзеля ўсіх тых, хто неправамерна пазбаўлены прафесіі. І дзеля таго, каб быў шанец у адвакатуры на перастварэнне і вяртанне даверу, — адзначае Дзмітрый Лаеўскі.
