Пуцін: Работы на пляцоўцы Беларускай АЭС ідуць з апярэджаннем графіка

"Найважнейшым сумесным інвестыцыйным праектам" назваў прэзідэнт Расіі Уладзімір Пуцін будаўніцтва Беларускай атамнай электрастанцыі.
 



"Работы на пляцоўцы электрастанцыі ідуць з апярэджаннем графіка", — заявіў ён 15 сакавіка ў Санкт-Пецярбургу паводле вынікаў пасяджэння Вышэйшага дзяржсавета Саюзнай дзяржавы.
 

Паводле слоў Пуціна, якія прыводзіць прэс-служба Крамля, першы блок АЭС плануецца ўвесці ў эксплуатацыю ў 2018 годзе, другі — у 2020-м. "Гэта вялікая інвестыцыя расійская, яна складзе да 10 млрд. долараў ЗША", — падкрэсліў прэзідэнт РФ.
 

"Набірае абароты працэс стварэння тэхналагічных альянсаў паміж прадпрыемствамі дзвюх краін, што мне ўяўляецца асабліва важным, — сказаў ён. — Пачата фарміраванне холдынга "Расбелаўта", у які ўвойдуць лідары расійскага і беларускага аўтапрамаў КамАЗ і МАЗ".

"Поўным ходам" ідзе стварэнне сумеснай сістэмы дыстанцыйнага зандавання Зямлі на аснове расійскай сістэмы ГЛАНАСС з наземным комплексам кіравання ў Мінску.
 

Расія і Беларусь "будуць сумесна працаваць у інтарэсах даследавання і асваення Антарктыкі, толькі што падпісана адпаведнае пагадненне". "Гэты прынцыпова новы кірунак у нашым узаемадзеянні, які мае адначасова і экалагічнае, і навуковае, і эканамічнае вымярэнне", — заявіў Пуцін.

Дзмітрый Уласаў, БелаПАН