Супраць кіраўніка АГП распачалі крымінальную справу за выдаванне даных следства

Супраць кіраўніка Аб’яднанай грамадзянскай партыі Мікалая Казлова распачалі крымінальную справу па ч. 1 арт. 407 Крымінальнага кодэкса («Выдаванне даных дазнання, папярэдняга следства або закрытага судовага пасяджэння»).

Нагадаем, у лютым на Казлова склалі пратакол па арт 23.4 («Непадпарадкаванне законнаму распараджэнню ці патрабаванню службовай асобы пры выкананні ёю службовых паўнамоцтваў») і далі 15 сутак пасля таго, як ён трэці раз запар адмовіўся даваць падпіску аб неразгалошванні падчас допыту ў Следчым камітэце паводле справы Каардынацыйнай рады. Па гэтай справе кіраўнік АГП праходзіць у якасці сведкі.

Як распавёў TUT.BY Мікалай Казлоў, крымінальную справу распачалі менавіта з-за справы Каардынацыйнай рады.

— Гэта звязана са справай супраць Каардынацыйнай рады, на допыты па ёй мяне ў якасці сведкі выклікалі тры разы. Што я там мог агалошваць, я не ведаю. Нічога колькі-небудзь сакрэтнага выдаць я не мог, таму што нічога такога я не ведаю і быў акуратны ў гэтым сэнсе. Адзінае, што я мог агалошваць, гэта тое, што справа сфабрыкаваная, але гэта і так усе ведаюць, што невінаватыя людзі сядзяць — усе ведаюць. Гэта адзіны сакрэт палішынеля, які я мог выдаць. Я знаходжуся ў Мінску, я маю намер наведаць следчага і ўсё высветліць, — распавёў Казлоў.

Санкцыя арт. 407 прадугледжвае штраф або арышт.