У Брагінскім раёне будуюць порт для выхаду да Чорнага мора, заключаны дагавор

У Брагінскім раёне да 2025 года плануюць пабудаваць порт з перспектывай выхаду да Чорнага мора, піша Еўрарадыё. 

Інвестыцыйны дагавор на 64 мільёны долараў з турэцкім бізнесменам падпісалі ў верасні, паведамляе "Беларусь 1".
Пад будаўніцтва порта на Дняпры, інфраструктуры, у тым ліку міжнароднага лагістычнага цэнтра, выдзелена каля 360 гектараў зямлі паблізу вёсак Ніжнія і Верхнія Жары.
"Калі порт пабудуюць, то ён дасць прыблізна тысячу рабочых месцаў. Дасць штуршок для развіцця інфраструктуры: жыллё, абслугоўванне, крамы, будаўнічыя арганізацыі, перапрацоўчыя арганізацыі і рамонтныя майстэрні, гэта будзе затрымка для моладзі, якая цяпер едзе ў вялікія гарады", — лічыць намеснік старшыні Брагінскага райвыканкама Пётр Раманюк.