У экс-следчага Юшкевіча ў СІЗА ўзялі падпіску аб неразгалошванні і прад'явілі яшчэ два абвіначанні

Былога следчага і ініцыятара праекта «ByChange» Яўгена Юшкевіча затрымалі 19 красавіка па падазрэнні ў «акце тэрарызму» (арт. 289 КК). Дома ў яго правялі ператрус, а яго самога змясцілі ў СІЗА КДБ, куды доўгі час не пускалі адваката. Зараз Юшкевіч знаходзіцца ў СІЗА-1, тэрмін утрымання пад вартай яму працягнулі да 19 жніўня.

Былога следчага і ініцыятара праекта «ByChange» Яўгена Юшкевіча затрымалі 19 красавіка па падазрэнні  ў «акце тэрарызму» (арт. 289 Крымінальнага кодэкса). Дома ў яго правялі ператрус, а яго самога змясцілі ў СІЗА КДБ, куды доўгі час не пускалі адваката. За месяц да затрымання ў машыне, якая належыць яго бацьку, невядомыя ўсталёўвалі «праслушку» — адпаведнае відэа з рэгістратара Яўген апублікаваў у Фэйсбуку. Зараз Юшкевіч знаходзіцца ў СІЗА-1, тэрмін утрымання пад вартай яму працягнулі да 19 жніўня. «Вясне» стала вядома, што, акрамя арт. 289 КК, яму прад'явілі абвінавачанні па арт. 342 і 293 Крымінальнага кодэкса. У Яўгена ўзялі падпіску аб неразгалошванні матэрыялаў справы па арт. 289 КК, каб ён нават сваім сукамернікам не мог расказаць, у чым яго канкрэтна абвінавачваюць. «Вясна» распавядае, што вядома пра пераслед былога следчага і пра яго цяперашні стан у СІЗА.

«Помста за выкладзенае відэа з усталяваннем "праслушкі" ў машыне». У СІЗА-1 прад’явілі абвінавачанні па арт. 342, 293 КК

Інцыдэнт, па якім абвінавачваюць Яўгена Юшкевіча ў акце тэрарызму, невядомы. Нават у самога Яўгена, якога ўжо 2,5 месяцы ўтрымліваюць пад вартай, узялі падпіску аб неразгалошванні, каб ён нават сваім сукамернікам не мог расказаць абставіны справы. Таксама ў яго на руках няма аніводнага дакумента па гэтай справе. Але, як распавядаюць крыніцы, яму прад'яўляюць тое, чаго наогул не існавала, не адбывалася ў рэальнасці. І ён, хоць і былы следчы, сам у шоку ад метадаў і ад таго, што адбываецца ў краіне і з ім персанальна: «Наогул нічога агульнага з законам».
Сам Яўген Юшкевіч расцэньвае свой пераслед і затрыманне як помсту за выкладзенае відэа з усталяваннем праслушкі ў машыне яго бацькі, на якой ён прыехаў 17 сакавіка на допыт у Следчы камітэт. Тады Яўген падзяліўся гэтай інфармацыяй у Фэйсбуку, бо асцерагаўся правакацый. Праз месяц яго затрымалі.
Па арт. 342 Крымінальнага кодэкса Яўгену Юшкевічу інкрымінуюць першую частку — «арганізацыю і ўдзел у дзеяннях, якія груба парушаюць грамадскі парадак». Але, паводле слоў Яўгена, «там няма нічога праўдзівага і прававога» і ён «вядома, нічога з прад'яўленага не здзяйсняў».
Нядаўна яму таксама прад'явілі абвінавачанне па арт. 293 Крымінальнага кодэкса, які прадугледжвае пакаранне да васьмі гадоў пазбаўлення волі. Юшкевіча вінавацяць у «закліках да гвалтоўных дзеянняў». Але, як кажа сам Яўген, ён «нідзе і ніколі не заклікаў да гвалтоўных або агрэсіўных супрацьпраўных дзеянняў. Ні ў сеціве, ні ў Тэлеграме, ні ў закрытых чатах, а наадварот перасцерагаў ад такіх дзеянняў».
Яўген мяркуе, што ў бліжэйшы час яго могуць зноў перавесці ў «амерыканку» (СІЗА КДБ). Ён хвалюецца пра «вобраз, які ў бліжэйшы час улады могуць пачаць яму ствараць пасля таго, як выціснуць з Рамана Пратасевіча ўсё, што можна».

Перахварэў на COVID-19, лісты не аддаюць

Сам Яўген трымаецца добра, але без асаблівага аптымізму. З сукамернікамі адносіны добрыя, усе адзін аднаго падтрымліваюць. Былы следчы ведае, што яму было напісана некалькі соцень лістоў, але іх не перадаюць. Атрымлівае толькі адзінкавыя.
Нядаўна ён перахварэў на COVID-19: не адчуваў пахаў два тыдні, вялікую частку часу праводзіў у сне ад слабасці. Потым пайшоў на папраўку. Нядаўна зусім «ажыў»: зноў пачаў адчуваць пахі, аднавіў чытанне і заняткі фізкультурай падчас прагулак.

Пераслед Яўгена Юшкевіча

Яўгена Юшкевіча раней ужо затрымлівалі па крымінальнай справе — 25 лістапада мінулага года. Яго падазравалі па ч. 1 арт. 342 КК — у «арганізацыі і падрыхтоўцы дзеянняў, што груба парушаюць грамадскі парадак, альбо актыўным удзеле ў іх». Праваабаронцы прызналі яго палітвязнем. 4 снежня яму змянілі меру стрымання на падпіску аб нявыездзе і адпусцілі на волю.
4 траўня стала вядома, што Аляксандр Лукашэнка пазбавіў званняў больш за 80 сілавікоў за «дыскрэдытуючыя ўчынкі», у іх ліку — Яўген Юшкевіч. Ён, як і іншыя пазбаўленыя званняў, «у перыяд абвастрэння грамадска-палітычнай абстаноўкі ў краіне з мэтай яе дэстабілізацыі нагняталі пратэсныя настроі ў грамадстве, арганізоўвалі і ўдзельнічалі ў несанкцыянаваных мерапрыемствах, размяшчалі ў сетцы Інтэрнэт экстрэмісцкія матэрыялы».

Хто такі Яўген Юшкевіч?

Яўген Юшкевіч некалькі гадоў працаваў следчым. Затым ён сышоў з СК і заняўся праграмаваннем, а летам 2020 года стаў адным з заснавальнікаў праекта «ByChange» па дапамозе ў навучанні і перападрыхтоўцы сілавікоў, чыноўнікаў і іншых грамадзян Беларусі, якія страцілі працу з-за сваіх палітычных поглядаў.
Адрас для лістоў:СІЗА-1, 220030, г. Мінск, вул. Валадарскага, 2Яўгену Юшкевічу 
spring96.org