У Гомелі масавыя затрыманні падлеткаў

У гандлёвым цэнтры «Сакрэт» у Гомелі праходзяць жорсткія затрыманні непаўналетніх. У гэтым месцы была назначана сустрэча па так званай «ПВК Родан» — новай «гульні» падлеткаў, падчас якой яны ладзяць масавыя бойкі.

Выданню «Фл*гшток» ад удзельніка сустрэчы стала вядома пра затрыманне як мінімум трох чалавек. На выхадзе з ГЦ «Сакрэт» міліцыя скарыстала гумавыя дубінкі.

«Бачу, ідуць шэсць міліцыянтаў і тры кежыкі [гопнікі], дужыя такія 16-гадовыя хлопцы, іх пачалі дубасіць, потым павязалі», — распавёў відавочца.

На ўваходзе ў ГЦ «Сакрэт» гамельчукі заўважылі АМАП і групы моладзі.

Паведамляецца, што сілавікі правяралі ў маладых людзей тэлефоны.

«Правяраюць галерэі, калі там усё чыста — адпускаюць», — расказалі суразмоўцы.

Пра лёс затрыманых пакуль нічога невядома.

Удзельнік чата так пракаментаваў убачанае: «Спачатку мянты прыехалі, яны ўсіх распужалі, але ўсім па**й, усе вяртаюцца. І ўжо амапаўцы пачалі выходзіць з машын, проста з левых аўто, з буса...».

Перапіска ў чаце, прысвечаным сходу «ПВК Родан», між тым суправаджалася ілжывымі паведамленнямі: «чаму нікога няма?», «няма тут ніякай міліцыі». Адзін з акаўнтаў у пацвярджэнне бяспекі сустрэчы выкладваў відэа з гандлёвага цэнтра, размешчанага не ў Гомелі.

Што такое «ПВК Родан»?

Цягам лютага ў Расіі і Украіне атрымала пашырэнне незвычайная субкультура, якая называе сябе «ПВК Родан».

Як адзначала «Н*ша Ніва», «ПВК Родан» ніяк не звязана з вайсковымі кампаніямі, абрэвіятура мае хутчэй жартоўны характар. Гэта супольнасць нефармалаў і аматараў анімэ, у прыватнасці, анімэ «Hunter x Hunter». Прыхільнікі «Родана» носяць штаны ў клетку, доўгія валасы, а таксама цішоткі з выявамі павукоў і лічбай 4, што і адсылае да анімэ. У Расіі яны выступаюць супраць футбольных фанатаў-ультрас, мігрантаў і выхадцаў з Каўказа.

У Расіі «ПВК Родан» ужо набыла вядомасць праз сутыкненні з футбольнымі фанатамі, хваляванні з удзелам субкультуры прайшлі і ва Украіне. У абедзвюх краінах праваахоўнікі зацікавіліся супольнасцю, і ўкраінскія сілавікі спрабуюць зразумець, ці ёсць у распаўсюджванні субкультуры расійскі след.

У Беларусі пакуль не было сутычак з удзелам «Родана», але ўжо з’явіліся прысвечаныя субкультуры паблікі. Спачатку стала вядома пра старонкі ў тэлеграме, якія каардынуюць прыхільнікаў у Гомелі і Магілёве, таксама «Родан» мае і сваю старонку для Мінска.

Гэтая старонка ў Тыктоку мае на момант напісання артыкула 612 падпісантаў. Мінскае «падраздзяленне» назвалі «МОЗД «Андеграунд» — расшыфроўваецца, як тлумачаць самі аўтары старонкі, як «Минское объединение здравого движения». Самае папулярнае відэа ў акаўнце выйшла ўсяго 16 гадзін таму, але ўжо мае больш за 35 тысяч праглядаў. У ім прадстаўнікі субкультуры прапануюць зладзіць сустрэчу ў раёне Каменнай Горкі і дэманструюць фота гіпермаркета «Green» — магчыма, гэта месца будучай сустрэчы.

Яшчэ ў акаўнце ёсць чатыры відэа, якія маюць недзе па 2-3 тысячы праглядаў, першы з ролікаў з’явіўся чатыры дні таму. У адным з іх, напрыклад, сцвярджаецца, што падраздзяленне, якому належыць акаўнт, не бярэ ў палон, і дэманструюцца кадры з барцамі ў зале.