Стала вядома, за што пасадзілі полацкую прадпрымальніцу, якая хацела перадаць калектыўны зварот уладам

У сераду, 26 кастрычніка, у Полацку была затрымана ІП Таццяна Шастак, якая збіралася перадаць старшыні Наваполацкага гарвыканкама Дзмітрыю Дзямідаву петыцыю ад мясцовых бізнесоўцаў. У звароце прадпрымальнікі прасілі ўлады растлумачыць, як ім працаваць з цэнаўтварэннем у новых умовах, піша «В*цебская вясна».

Таццяну затрымалі а сёмай гадзіне раніцы, калі яна выходзіла з дома ў Полацку, і завезлі ў мясцовы РАУС. Пасля складання пратакола ў яе кватэры быў праведзены ператрус, падчас якога міліцыянты канфіскавалі ўсе дакументы з калектыўным зваротам прадпрымальнікаў да Дзямідава і асабісты тэлефон.

У гэты ж дзень суд Полацкага раёна арыштаваў Шастак на 30 сутак. Сябры і сваякі не змаглі патрапіць на судовае пасяджэнне, бо суд прайшоў раптоўна ў паскораным рэжыме.

Пакуль невядома, па якім артыкуле арыштавалі прадпрымальніцу. У судзе яе мужу адмовіліся паведаміць, у чым абвінавацілі Таццяну.

Сваякі 29 кастрычніка спрабавалі зрабіць перадачу Таццяне ў ІЧУ Віцебскага аблвыканкама, дзе прадпрымальніца адбывае арышт. Аднак у ізалятары без тлумачэнняў адмовіліся прымаць прадукты харчавання, дазволілі толькі перадаць зняволенай асабістыя прадметы гігіены.

UPD. Як стала вядома праваабаронцам, Таццяну Шастак адправілі на «суткі» з-за аватаркі ў сацсетках. Што гэта была за аватарка, невядома.

Блізкія Таццяны просяць людзей не пісаць ёй у сацсетках, бо яны пад кантролем міліцыі.


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: