У Століне пабудавалі пункт часовага ўтрымання хатніх жывёл

Пункт часовага ўтрымання хатніх жывёл стварылі пры Столінскім ЖКГ. Да гэтага нічога падобнага на Століншчыне не было.

Пункт часовага ўтрымання хатніх жывёл зроблены за ўласныя сродкі ЖКГ. Ён уяўляе сабой будынак з шасцю вальерамі, кожны з якіх абсталяваны будкай і посудам для вады і ежы. Вальеры замыкаюцца на завалу.

У Столінскім ЖКГ адзначаюць, што вальеры прызначаныя для часовага (на працягу пяці дзён) ўтрымання толькі хатніх катоў і сабак, падабраных работнікамі гаспадаркі на вуліцах райцэнтра. Інфармацыю аб хатніх гадаванцах, якія трапілі ў гэтыя вальеры, разам з іх фотаздымкамі будуць размяшчаць у сродках масавай інфармацыі, у сацыяльных сетках, каб уладальнікі страчаных жывёл як мага хутчэй знайшліся. Людзі таксама самі могуць звяртацца ў ЖКГ, каб высветліць, напрыклад, калі раптам іх сабака адарвалася з прывязі і ўцякла, ці не знаходзіцца яна выпадкова ў гэтым пункце, каб хутчэй вярнуць жывёлу дадому.

Для харчавання жывёл у гэтым пункце часовага ўтрымання таксама неабходныя грашовыя сродкі. Таму яго працу плануюць пачаць са студзеня наступнага года. Тым не менш, літаральна на днях у пункце з'явіліся першыя гадаванцы. Гэта маленькі чорны кудлаты шчанюк з сумнымі вачыма і два ката.

— Шчанюка і катоў мы пакінем тут, нікуды яны не падзенуцца. Калі хто-то, убачыўшы іх на фатаграфіі, захоча забраць да сябе, перашкаджаць не будзем. Забірайце. Але калі гаспадара для іх не знойдзецца, пакінем жыць у нас на тэрыторыі. Шчанюк вырасце і, магчыма, будзе тут добрым вартаўніком, — кажа начальнік участка добраўпарадкавання Столінскага ЖКГ Генадзь Пяшко.
Паводле media-polesye.by