Урад Літвы можа сысці ў адстаўку праз скандал з транзітам «Беларуськалія»

Прэм'ер-міністр Літвы Ігрыда Шымонітэ мае намер сёння ўвечары абвясціць аб сваім рашэнні з нагоды адстаўкі міністраў транспарту і замежных спраў. Раней Марус Скуодзіс і Габрыэлюс Ландсбергіс напісалі прашэнні аб адстаўцы на фоне сітуацыі з транзітам угнаенняў «Беларуськалія».

Як паведамляе BNS, Шымонітэ сёння збіраецца сустрэцца з імі і ўвечары аб'явіць аб сваім рашэнні. Пры гэтым яна не выключае, што можа сысці ў адстаўку ўвесь урад.

«Калі ёсць так шмат пытанняў аб дзейнасці ўрада, то, магчыма, калі ўрад не адкажа на гэтыя пытанні, ён павінен спыніць свой мандат, і нейкі іншы ўрад маг бы працягнуць гэтую працу з нуля», — цытуе Шымонітэ агенцтва.

Нагадаем, у Літве выліўся сапраўдны палітычны скандал, калі высветлілася, што пасля ўступлення ў сілу санкцый ЗША ў дачыненні да «Беларуськалія» транзіт угнаенняў праз краіну прадоўжыўся. Пры гэтым у жніўні Ландсбергіс і Скуодзіс заяўлялі, што ў снежні ён, хутчэй за ўсё, спыніцца, бо банкі адмовяцца абслугоўваць плацяжы. Аказалася, што «Беларуськалій» разлічваецца з Літоўскай чыгункай і тэрміналам у Клайпедскім порце ў еўра, у іх ёсць доўгатэрміновыя кантракты на паслугі, заключаныя да абвяшчэння санкцый, акрамя таго, чыгунка атрымала перадаплату за перавозкі. Аднабаковае скасаванне кантракту кампаніям пагражае вялікімі санкцыямі, у адпаведнасці з дамовамі. Мінтранс Літвы ў выніку ўнёс законапраект аб увядзенні нацыянальнага рэжыму санкцый у дачыненні да транзіту.
Паводле reform.by.