Валянцін Стэфановіч: «Канстытуцыя будзе яшчэ горшай за тую, што мы маем цяпер»

Праваабаронца-палітвязень Валянцін Стэфановіч у лісце з-за кратаў разважае пра новы варыянт Канстытуцыі, прапанаваны на рэферэндум: «Смешныя змены, але не было б так смешна, як сумна».
Валянцін Стэфановіч

Валянцін Стэфановіч

Намеснік старшыні праваабарончага цэнтра «Вясна» і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч, як і яшчэ трое праваабаронцаў «Вясны», утрымліваецца за кратамі ўжо сёмы месяц. Валянцін у нядаўнім лісце з-за кратаў паведаміў, што яму працягнулі меру стрымання да 14 сакавіка і, паводле слоў следчага, расследаванне па «справе "Вясны"» можа быць скончанае напрыканцы вясны. Таксама праваабаронца выказаўся пра меркаваныя змены ў Канстытуцыю і рэферэндум, паведамляюць праваабаронцы.

«У мяне ўсё добра, наколькі гэта можа быць у турме. Асаблівых навінаў у мяне няма. Сёння хадзіў гуляць на вуліцу і глядзеў на неба, як я заўсёды раблю на шпацыры. Неба было такое блакітнае, такое яснае, нават сонейка з’явілася. Мне ўсё гэта нагадала вясну, хаця да вясны яшчэ месяц.

У мяне асаблівых зменаў няма. Дні ідуць за днямі, тыдні за тыднямі. Працягнулі меру стрымання мне да 14 сакавіка. Следчы сказаў, што да траўня, можа, справу закрыюць і я пачну азнаямленне з матэрыяламі. Увогуле сядзець мне тут яшчэ доўга, можа да чэрвеня-ліпеня — каля года. Гэта з усімі працэдурамі — судамі і інш. Так што, час ідзе ўжо на змяншэнне, ну а што будзе на судзе — час пакажа.

Час бяжыць і вось ужо хутка будзе сем месяцаў, як я пад вартай. Па іроніі лёсу сем месяцаў будзе 14-га лютага, на мае імяніны. Я хоць і не святы, але дакладна Валянцін :)».

Пра змены ў Канстытуцыю і рэферэндум

«Ведаю, што навінаў пазітыўных, на жаль, не шмат і думаю, што прынамсі да 27-га лютага ўсё будзе ва ўзмоцненым рэжыме. Ім [уладам] трэба, каб усё прайшло гладка і без непрыемных для іх сюрпрызаў.

Я, дарэчы, канешне, азнаёміўся з прапанаванымі зменамі ў "СБ". Смешныя змены, але не было б так смешна, як сумна. Уціснулі ў класічную схему трох галінаў уладаў чацвёртую, якая будзе надзеленая мегапаўнамоцтвамі, будзе кантраляваць тры астатнія, але пры гэтым не абіраецца наўпрост грамадзянамі. Вось такая дэмакратыя без выбараў. Асаблівы шлях. Я, калі б быў на волі, проста не хадзіў і не прымаў удзел у гэтым [рэферэндуме].

Ну што тут скажаш, Канстытуцыя будзе яшчэ горшай за тую, што мы маем цяпер. Яшчэ менш рэжымаў дэмакратыі нам засталося. Можна шмат разважаць на тэму падзелаў галінаў улады. Я б адзначыў такі момант — тое, што «дэмакратыя ў Беларусі будзе ажыццяўляцца на падставе ідэалогіі беларускай дзяржавы». А што гэта за ідэалогія такая і, самае галоўнае, кім яна сфармуляваная і напісаная? Дэмакратыя мусіць ажыццяўляцца на падставе палітычнага плюралізму і разнастайнасці ідэалогій. Ніякая ідэалогія не можа быць устаноўленай у якасці абавязковай для ўсіх. Гэта вяртанне ў камуністычныя часы. Гэта не тыя перамены, якіх патрабавалі і патрабуюць нашыя людзі».

 


Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: