Віктар Бабарыка: «Усё ў нас будзе добра. Жыве Беларусь!»

Віктар Бабарыка перадаў з турмы прывітанне ўсім, хто віншаваў яго з народзінамі. Але ніводная паштоўка вязню не дайшла.

Віктар Бабарыка, якому ў СІЗА КДБ не перадалі лісты і паштоўкі з віншаваннямі, перадаў дзякуй усім, хто іх дасылаў, хто пісаў каментары ў сацыяльных сетках і хто верыць у дабро, людзей і нашу краіну.
"Дарагія сябры! Прашу прабачэння за досыць доўгае маўчанне, але я чакаў, што тыя, хто «клапоціцца» аб маім самаадчуванні, усё ж прапусцяць лісты і паштоўкі, але на жаль. Таму атрымліваецца некалькі дзіўная камунікацыя.
У першы (і, спадзяюся, адзіны) раз у маім жыцці я вымушаны дзякаваць за віншаванні і пажаданні ў мой ДН вам усім, не бачачы і не ведаючы, хто і што мне пісаў у гэты дзень.
І хоць быў заўсёды прыхільнікам веды, я цяпер вымушаны стаяць на пазіцыі веры. Веры ў тое, што ёсць людзі, якія даслалі мне свае віншаванні і пажаданні, тыя, хто застаўся ў ліку рэальных і віртуальных сяброў, каму неабыякавыя тыя думкі і ўчынкі, якія абумовілі сённяшнюю сітуацыю.
Па незалежных ад мяне прычынах я апынуўся адрэзаны ад рэальнага свету, але я ўпэўнены, што згодных са мной людзей не стала менш, чым іх было да 2020/06/18.
Дзякуй вам усім велізарны за тое, што захавалі веру ў мяне, у сябе, у нашых людзей і ў краіну!
Дзякуй за падтрымку, якую я часам чую. Дзякуй за цеплыню, дабро і клопат, якія вы дэманструеце ў сённяшняй няпростай сітуацыі.
А самае галоўнае - дзякуй за тое, што вы ўсё ёсць у мяне, у маіх родных і сяброў, у сваіх каханых і блізкіх, у нашай краіны. Мы - разам, значыць, мы пераможам, і ўсё ў нас будзе добра. Жыве Беларусь!»