Канцэрты толькі з дазволу ідэолагаў
Канцэрты, спектаклі і культурна-відовішчныя імпрэзы ў Беларусі будуць праводзіцца з дазволу ўпраўлення ідэалагічнай работы гарвыканкама Мінска — гаворыцца ва ўказе, падпісаным прэзідэнтам краіны Аляксандрам Лукашэнкам.
Кадр з фільма «Жыве Беларусь»
«Указам прадугледжваецца, што арганізатар абавязаны атрымаць пасведчанне на права арганізацыі
і правядзення культурна-відовішчнай імпрэзы на
тэрыторыі Рэспублікі Беларусь (гастрольнае пасведчанне) ва ўпраўленні ідэалагічнай працы, культуры і па справах моладзі аблвыканкама (Мінскага гарвыканкама)»,
— гаворыцца ў паведамленні прэс-службы прэзідэнта.
Арганізатарам канцэртаў замежных выканаўцаў трэба будзе для атрымання гастрольнага пасведчання аплаціць дзяржаўную пошліну ў адмысловы фонд прэзідэнта па падтрымцы таленавітай моладзі. Беларускім выканаўцам пасведчання будуць выдавацца бясплатна.
Дарэчы, такая сістэма ўжо існавала ў Беларусі да 1 студзеня 2011 года. Потым яна была скасаваная прэзідэнцкім указам № 542 ад 19 кастрычніка 2010 года — «з мэтай удасканалення дзейнасці па правядзенні культурна-відовішчных імпрэз у Рэспубліцы Беларусь». А зараз ізноў увялі чарговым прэзідэнцкім указам — і зноў жа дзеля «ўдасканалення практыкі арганізацыі і правядзення такіх імпрэз».
«Радыё Свабода» на сваёй старонцы ў Facebook пацікавілася, якія думкі маюць на гэты конт яе падпісчыкі. Першым адказам было: «Думкі? А вы ўзялі дазвол у ідэолагаў на думанне?»