Беларускі МЗС сочыць за лёсам асуджанага ў Расіі Кірыла Сілівончыка
МЗС адказаў Партыі БНФ на зварот па справе асуджанага ў Расіі беларуса Кірылы Сілівончыка.
Партыя БНФ звярталася ў МЗС з заклікам запатрабаваць ад расійскага боку вычарпальныя тлумачэнні па справе грамадзяніна Беларусі Кірыла Сілівончыка і ўжыць усе магчымыя захады для вяртання нашага суайчыньніка на Радзіму і яго найхутчэйшага вызвалення.
У сваім адказе Міністэрства замежных спраў паведамляе, што назірае за развіццём сітуацыі вакол Сілівончыка, перш за ўсё, за выкананнем яго правоў і законных інтарэсаў у адпаведнасці з Канвенцыяй на міждзяржаўным узроўні.
Як сцвярджае МЗС, звесткі, атрыманыя ў кансультацыях з расійскім бокам і адвакатамі Сілівончыка, сведчаць аб адсутнасці неабгрунтаванага абмежавання правоў беларускага грамадзяніна.
Таксама паведамляе, што ў часе камунікацыі прадстаўнікоў МЗС з Сілівончыкам ён не выказваў просьбы аб конскульска-прававой дапамозе і не скардзіўся ні на што. Пажаданне адбываць пакаранне на тэрыторыі Беларусь Сілівончык таксама не выказваў і запэўніў, што яго рашэнне аб нежаданні абскарджваць прысуд было асэнсаваным.
У красавіку 22-гадовага беларускага праграміста Кірылу Сілівончыка, які прыехаў у Ніжні Ноўгарад на заробкі, прысудзілі да двух гадоў калоніі-пасялення.
Яго абвінавацілі паводле артыкула "Публічнае апраўданне тэрарызму альбо публічныя заклікі да яго". Падставай быў нібы перапост на яго інтэрнэт-старонцы "Вконтакте". Паведамленні пра змест і характар гэтых перадрукаў з’яўляюцца супярэчлівымі. Вядома, што Сілівончык публікаваў на сваёй старонцы ў сацсетцы тэксты і малюнкі у падтрымку Украіны і з асуджэннем расійскай агрэсіі. У прыватнасці, як адзначае пракуратура, ён заклікаў «вярнуць Крым Украіне».
Паводле прэс-службы ПБНФ