Крыніцы: У Беларусі можа прайсці рэферэндум аб «зліцці» з Расіяй

Разам з рэферэндумамі ў самаабвешчаных «ЛДНР» можа прайсці плебісцыт у Беларусі аб «зліцці» з Расіяй. Пра гэта паведамляе расійскае выданне «Медуза» са спасылкай на свае крыніцы.

«Медуза» распавядае, што ўлады РФ не адмовіліся ад ідэі правесці рэферэндумы па далучэнні да Расіі самаабвешчаных «ДНР» і «ЛНР», а таксама занятай расійскімі войскамі Херсонскай вобласці. Калі менавіта яны могуць прайсці, залежыць ад сітуацыі на фронце. Пакуль самая рэалістычная дата — 11 верасня, у адзіны дзень галасавання.

Паводле звестак крыніц выдання, у тыя ж тэрміны можа прайсці рэферэндум аб далучэнні Паўднёвай Асеціі. Яны ж не выключаюць, што разам з рэферэндумамі ў самаабвешчаных рэспубліках Данбаса можа прайсці плебісцыт аб «зліцці» з Расіяй у Беларусі.

«Але гэта калі ўдасца праціснуць Лукашэнка, які ад такога сцэнара ўсяляк сыходзіць», — падкрэслівае адзін з суразмоўцаў.