МЗС Беларусі спадзяецца на поўную адмену санкцый ЕС

МЗС Беларусі чакае поўнай адмены санкцый ЕС. Пра гэта заявіў прэс-сакратар Міністэрства замежных спраў Дзмітрый Мірончык 15 кастрычніка на брыфінгу ў Мінску, адказваючы на пытанне аб рэакцыі беларускага боку на інфармацыю аб магчымым прыпыненні санкцый у дачыненні да Беларусі.



sanks_bel.jpg

“Мы каментуем канкрэтныя падзеі і факты. Наша пазіцыя па тэме антыбеларускіх санкцый вядомая: яны паказалі сваю неэфектыўнасць і бесперспектыўнасць. Чакаем іх поўнай адмены і спадзяемся, што гэта адбудзецца як мага хутчэй”, — заявіў Мірончык, перадае БелаПАН.

12 кастрычніка міністры замежных спраў краін Еўрасаюза на пасяджэнні Савета ЕС дамовіліся аб прыпыненні на чатыры месяцы санкцый у дачыненні да Беларусі, аднак афіцыйнае рашэнне па гэтым пытанні павінна быць прынята да канца кастрычніка.

У цяперашні час пад візавыя і фінансавыя санкцыі Еўрасаюза падпадаюць 175 беларускіх грамадзян і каля 20 прадпрыемстваў, якіх ЕС абвінавачвае ў парушэнні правоў чалавека і фінансаванні беларускага рэжыму.