Прадстаўніка Ціханоўскай Валерыя Кавалеўскага не пусцілі ва Украіну

Прадстаўнік Святланы Ціханоўскай па міжнародных справах Валерый Кавалеўскі распавёў, што 1 жніўня яго не пусцілі ва Украіну.

valery_kovalevsky_3.jpg

Прадстаўнік Святланы Ціханоўскай па міжнародных справах, а цяпер таксама член Аб'яднанага пераходнага кабінета Валерый Кавалеўскі 1 жніўня адправіўся ва Украіну — планаваў наведаць Кіеў на некалькі дзён, каб сустрэцца з дыяспарай і правесці некалькі працоўных сустрэч. Але на польска-ўкраінскай мяжы яму адмовілі ва ўездзе. Сам прадстаўнік дэмсіл распавёў «Л*стэрку», што не бачыць у гэтым нічога экстраардынарнага і ўдакладняе: украінцы яго ўжо заварочвалі.

З пачатку вайны ва Украіне ён наведаў гэтую краіну не менш за восем разоў. Паводле яго слоў, ужо здаралася так, што яго не ўпускалі на тэрыторыю Украіны з першай спробы.

— Такія інцыдэнты адбываліся і раней, прычым не толькі са мной, але і з іншымі маімі калегамі. Бывала, што нас здымалі з цягніка, мы чакалі раніцы, калі прачнецца Кіеў, СБУ дасць дабро на праезд. Але ўсё дазвалялася, і мы заязджалі ва Украіну. Аднойчы была сітуацыя, калі мяне не пусцілі ва Украіну і адправілі назад у Польшчу. Тады я зрабіў другую спробу на наступны дзень і нармальна праехаў ва Украіну. Прычым была тая ж самая змена [на мяжы], такі ж пакет дакументаў, як і заўсёды, — распавядае Валерый Кавалеўскі.

Дакладных прычын адмоў прадстаўнік дэмсілаў не ведае. Але мяркуе, што гэта можа быць звязана са збоямі ў сістэме, эксцэсамі выканаўцаў ці нейкімі іншымі абставінамі. Адмаўляючы ва ўездзе, памежнікі не ўнікаюць у падрабязнасці, але звычайна паказваюць на недастатковасць падстаў для ўезду ў краіну.

— У гэты раз калі мяне не пусцілі, у мяне быў дэфіцыт часу, і я не стаў паўтараць спробу. Мне трэба было вяртацца на канферэнцыю ў Вільні (яна праходзіла 8-9 жніўня.). Але прычыны, якія мне агучылі, былі падобнымі на папярэднія: яны не ўбачылі дастатковых падстаў для майго знаходжання ва Украіне, — кажа Кавалеўскі.

У цяжкасцях з перасячэннем мяжы Кавалеўскі не вінаваціць Кіеў, кажа, у аснове такога становішча спраў «ляжыць рашэнне Лукашэнкі ўцягнуць Беларусь у вайну, і з-за гэтага памянялася стаўленне да ўсіх грамадзян краіны з боку Украіны».

— Важна разумець, што для Украіны цяпер усе грамадзяне Беларусі з'яўляюцца прадстаўнікамі краіны-агрэсара. З нас асаблівы попыт. На нас [украінцы] глядзяць па-асабліваму і вельмі старанна правяраюць носьбітаў беларускіх пашпартоў. Менавіта таму ва ўсіх беларусаў узнікаюць такія праблемы, незалежна ад таго, гэта прыватныя асобы або афіцыйныя прадстаўнікі. Так што справа не ў тым, што вылучылі з натоўпу менавіта мяне і адмаўляліся ўпусціць. Тое, што такое адбылося з прадстаўніком офіса Святланы Ціханоўскай, надае гэтаму пэўную афарбоўку, але ўсё ж я б не спяшаўся рабіць нейкія маштабныя высновы, паколькі пакуль рэальная прычына адмовы не зразумелая.

Аб адмове ва ўездзе прадстаўнік лідара дэмсілаў праінфармаваў партнёраў, дзяржструктуры ў Кіеве. Наступную паездку, кажа, будзе планаваць пасля таго, як атрымае тлумачэнні аб прычынах адмовы ва ўездзе або запэўніванні аб тым, што перасячэнне мяжы пройдзе без праблем.