Тышкевіч: Мінск не рызыкнуў сапсаваць адносіны з Украінай, у Крым паслалі каго не шкада

Аналітык Украінскага цэнтра будучыні Ігар Тышкевіч разважае пра візіт беларускай дэлегацыі ў Крым.

— Такім чынам, пасля заявы Лукашэнкі па Крыме ў інтэрв'ю Кісялёву паўстала пытанне пацвярджэння гучных фраз. Або дакумент або дзеянні, — піша Тышкевіч у сваім тэлеграме. — Пра гэта наўпрост і заявіў Пяскоў.

У якасці фармальнай падставы «прыехаць» можна было лічыць урачыстасці, прысвечаныя Максіму Багдановічу. Усё ж такі —130 гадоў. Анансавалі візіт беларускай дэлегацыі ў Крым.

Яна і прыехала. У вельмі пацешным складзе: аналітыкі (праўладныя) Аляксандр Шпакоўскі і Аляксей Дзермант, кіраўнік аргкамітэта прарасійскай партыі "Саюз" Сяргей Лушч, аналітык БІСІ Аляксей Аўдонін і намеснік старшыні Руху "Белая Русь" Аляксандр Шацько.

З аднаго боку, ніхто з названых не займае хоць нейкіх значных пасадаў у сістэме ўлады. З іншага — Аўдонін павінен прадэманстраваць сувязь з адміністрацыяй прэзідэнта, Шацько тыпу прадстаўнік палітычных элітаў. Гэта калі моцна напружыцца.

Такім чынам, у Мінску вырашылі пакуль не рызыкаваць разрывам адносінаў з Украінай. Падстрахаваліся і паспрабавалі сфарміраваць дэлегацыю з тых, каго не шкада.

Маскву гэта наўрад ці задаволіць. Таму на крымскую тэму Лукашэнка будуць тузаць далей. З выдумкай, запалам і настойлівасцю. Будзе цікава…

Паводле gazetaby.com